Nəqliyyatın hərəkətini daha da asanlaşdırmaq üçün paytaxtın giriş-çıxış yollarında işlər görülür VİDEO
Bakı, 23 yanvar, AZƏRTAC
Qərb və cənub istiqamətindən gələn və paytaxta cənub girişdən daxil olan nəqliyyat yükünü xeyli yüngülləşdirən Bakı Dairəvi-1 avtomobil yolunda aparılan təmir-tikinti işləri həmin istiqamətdə nəqliyyat axınına müsbət təsir edərək sıxlığın aradan qaldırılmasına, vətəndaşların daha rahat bir yolla mənzil başına çatmağına yardımçı olub.
“Azəryolservis” ASC-nin mətbuat xidmətindən AZƏRTAC-a bildirilib ki, paytaxtın cənub giriş-çıxışında nəqliyyatın hərəkətində edilmiş daha bir dəyişiklik də nəqliyyat axınına müsbət təsir edib. Belə ki, Səbail rayonu “20-ci sahə” deyilən ərazidə sıxlığın aradan qaldırılması və “Lökbatan” dairəsi istiqamətinə doğru hərəkətdə olan nəqliyyat vasitələrinin daha rahat hərəkətinin təmin edilməsi məqsədilə “Bibiheybət yolu”nda (“Bibiheybət” məscidindən Bakı Su İdmanı Sarayına qədər olan hissədə) nəqliyyat vasitələrinin iki istiqamətli hərəkətinin təşkili üçün “Azəryolservis” ASC tərəfindən işlər aparılıb.
Paytaxtın şimal girişində də bu çərçivədə “Azəryolservis” ASC tərəfindən xeyli iş görülüb. "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"na əsasən Bakı-Quba-Rusiya Federasiyası ilə dövlət sərhədi avtomobil yolunun 6-11 kilometrində yaranan tıxacların aradan qaldırılması məqsədilə həyata keçirilən kompleks tədbirlər çərçivəsində göstərilən yolun 9-cu kilometrində yerləşən mövcud yol ötürücüləri sökülərək yerində 400 metr uzunluğunda müasir tipli yol ötürücülərin inşası aparılıb.
Bundan əlavə həmin ərazidə 995 metr uzunluğunda istinad divarları inşa edilib, yan yol genişləndirilərək 15 metrə çatdırılıb. Ümumiyyətlə sözü gedən ərazidə aparılan kompleks tədbirlərdən sonra yol 2-4 hərəkət zolağı enində genişləndirilib. Bu isə həmin ərazidə yaranan “tıxac”ın xeyli azalmasına gətirib çıxarıb.
Hazırda da sözügedən yolun genişləndirilməsi istiqamətində addımlar atılır. Bu məqsədlə bəzi hissələrdə yol kənarında olan süni təpələr sökülür, nəticədə yolun hərəkət hissəsi xeyli genişlənir.
Vətəndaşların təhlükəsizliyi nəzərə alınaraq “Azəryolservis” ASC tərəfindən yol ayrıcında quraşdırılmış əyri xətli dəmir tirlər sökülərək, beton arakəsmələrlə əvəzlənir. Qeyd edək ki, beton arakəsmələr dəmir tirlərdən daha təhlükəsizdir. Çünki betonun aşağısında xüsusi təkərqaytaran hissə-deflektor mövcuddur. Yol qəzaları zamanı nəqliyyat vasitələrinin beton maneə ilə toqquşması əksər vaxtlarda 12 dərəcə bucaq altında baş verir. Nəticədə nəqliyyat vasitəsi təkərqaytarana dəyərək geriyə, yolun hərəkət hissəsinə qayıdır və bir-çox hallarda beton maneə ilə birbaşa toqquşma qeydə alınmır.
Təmir-tikinti işləri Şamaxı istiqamətindən paytaxta giriş-çıxışda da aparılır. Bakı-Şamaxı-Yevlax avtomobil yolunun “Sulutəpə dairəsi”ndən “Hökməli dairəsi” və Müşviqabad qəsəbəsinə qədər olan hissəsində yol kənarları abadlaşdırılır, piyada səkiləri tikilir. Piyada səkilərinin tikintisi sözügedən ərazinin yaşayış məntəqələrindən keçən hissəsində aparılır. Yol boyu hər iki istiqamət üzrə salınan səkilərin eni 1,5 metrdir. Səkilərin kənarlarına səki daşları düzülür, üstü isə asfaltlanır.
Avtomobil yolundan səth sularının kənarlaşdırılması üçün tikintinin aparıldığı ərazilərdə drenaj sistemi qurulur. Bundan başqa mövcud olan avtobus dayanacaqlarının ərazilərində sərnişin avtobuslarının rahat giriş-çıxışını təmin etmək və ümumi hərəkətə mane olmamaq məqsədilə xüsusi “cib”lər yaradılır. “Cib”lərin uzunluğu 30 metr, eni isə 3-5 metr təşkil edir.
Bakıdan Şamaxı istiqamətində, “Hökməli dairəsi”ndə yolun sağında olan süni yaşıllıq təpəciyinin sökülməsi işləri də aparılıb. Bununla da yolun hərəkət hissəsi xeyli genişlənib. Nəticədə nəqliyyat vasitələri daha rahat və maneəsiz şəkildə dairəyə daxil olaraq hərəkətlərinə davam edə bilirlər.
Aparılan təmir-tikinti işləri çərçivəsində yol ayrıcında olan və yolun ümumi görünüşünə xələl gətirən beton tökmə hissələr də sökülərək əvəzinə beton arakəsmələr düzülür.
“Azəryolservis” ASC tərəfindən məqsədyönlü şəkildə aparılan bu işlər paytaxt Bakıya bütün istiqamətlərdən giriş-çıxışların daha rahat olmasına, nəqliyyat sıxlığının aradan qaldırılmasına hesablanıb. Birinci mərhələdə bu istiqamətdə atılmış addımlar artıq öz müsbət nəticəsini verib. İkinci mərhələdə atılan addımlar nəticəsində də indidən müsbət dəyişikliklərin olduğunu açıq-aşkar görmək mümkündür.
Bölmənin digər xəbərləri
