REGİONLAR
Ağstafada regionların inkişafında sahibkarlığın rolu müzakirə olunub VİDEO
Ağstafa, 5 mart, AZƏRTAC
Regionların 2014-2018-ci illərdə sosial-iqtisadi inkişafı Dövlət Proqramının icrası çərçivəsində qeyri-neft sektorunun inkişafı, makroiqtisadi sabitliyin təmin olunması, sahibkarlıq fəaliyyətinin genişlənməsi, yeni müəssisə və iş yerlərinin yaradılması və digər sahələrdə bir sıra mühüm işlər görülür. Qarşıdakı illərdə məşğulluğun artırılması məqsədilə regionlarda ənənəvi istehsal sahələrinin, o cümlədən pambıqçılığın, tütünçülüyün, eləcə də xalçaçılığın və digər sənətkarlıq növlərinin inkişaf etdirilməsi üçün müvafiq tədbirlərin görülməsi də diqqət mərkəzində olacaq.
AZƏRTAC xəbər verir ki, bu barədə Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının təşkilatçılığı, İqtisadiyyat və Kənd Təsərrüfatı nazirliklərinin dəstəyi ilə martın 5-də Ağstafa rayonunda “Regionların inkişafında sahibkarlığın rolu” mövzusunda keçirilən regional forumda məlumat verilib.
Tədbirdə bir sıra dövlət qurumlarının nümayəndələri ilə yanaşı, Bakı şəhəri, Ağstafa, Tovuz və Qazax rayonlarından 120-dən çox sahibkar və fermer iştirak edib. Forumda Dövlət Proqramının yerinə yetirilməsi, regionlarda sənayenin inkişafı, sahibkarlara dəstək göstərilməsi və s. məsələlər müzakirə olunub.
Ağstafa Rayon İcra Hakimiyyətinin başçısı Məhərrəm Quliyev çıxış edərək bildirib ki, Azərbaycan Respublikasının Prezidenti İlham Əliyevin sahibkarlığın inkişafı və yeni iş yerlərinin yaradılması, əhalinin məşğulluğunun artırılması və rayonların dotasiyadan asılılığının aradan qaldırılması istiqamətindəki tapşırıqlarının icrası ilə bağlı ardıcıl tədbirlər həyata keçirilir. Rayonda cari ilin fevral ayı ərzində 312 yeni iş yeri yaradılıb, 247 nəfər işlə təmin edilib. Ənənəvi istehsal sahələrinin bərpası istiqamətində də əməli iş görülür. Belə ki, xalça istehsalı sahəsinin yaradılması üçün sərmayə cəlb edilməsi işi yekunlaşmaq üzrədir. Xalçaçılıq üçün artıq müvafiq bina müəyyən edilib, Heydər Əliyev Mərkəzində xalçaçılıq kursu fəaliyyətə başlayıb. İstifadəsiz qalan torpaq sahələrinin müəyyənləşdirilməsi və iri fermer təsərrüfatlarının təsis edilməsi də diqqət mərkəzindədir. Ağstafa rayonu üzrə istifadəsiz qalan 6426 hektar torpaq sahəsi müəyyən edilib və bu sahələrin əkinə cəlb olunması planlaşdırılır. 2000 hektar torpaq sahəsini əhatə edən taxılçılıq və 500 hektar sahəsi olan intensiv-kartofçuluq təsərrüfatlarının yaradılması istiqamətində təşkilati işlər görülür. Eyni zamanda, torpaq mülkiyyətçilərinin pay torpaqlarını birləşdirmək yolu ilə iri təsərrüfatların yaradılması istiqamətində maarifləndirmə işləri aparılır.
Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev çıxışında bildirib ki, fermerlərə satılan gübrəyə, yanacaq və motor yağlarına görə subsidiyaların artırılması, “Aqrolizinq” ASC-nin xətti ilə gətirilən texnikaya yeni güzəştlərin tətbiqi və digər tədbirlər yaxın zamanlarda aqrar sahənin inkişafına öz töhfəsini verəcək. Ötən il aqrar sahədə 5100 sahibkarlıq subyektinin investisiya layihəsinin maliyyələşdirilməsinə 213 milyon manata yaxın güzəştli kredit verildiyini deyən M.Musayev vurğulayıb ki, biznes və investisiya mühitinin yaxşılaşdırılması ilə bağlı həyata keçirilən sistemli tədbirlər bu gün xüsusilə mühüm əhəmiyyət kəsb edir.
İqtisadiyyat nazirinin müavini Sahib Məmmədov isə çıxışında ölkədə yaradılan əlverişli biznes mühiti ilə bağlı məlumat verərək diqqətə çatdırıb ki, sahibkarlıq subyektlərində yoxlamalar 2 il müddətinə dayandırılıb, lisenziya tələb olunan fəaliyyət növlərinin sayı 59-dan 37-yə endirilib, lisenziyalar müddətsiz müəyyən edilib. Eyni zamanda, dövlət rüsumunun məbləği Bakıda 2 dəfə, regionlarda isə 4 dəfə azaldılıb, lisenziyaların İqtisadiyyat Nazirliyi tərəfindən “ASAN xidmət” mərkəzlərində verilməsinə və “Elektron lisenziya” portalının yaradılmasına başlanılıb.
S.Məmmədov qeyd edib ki, investisiyaların təşviqi və qeyri-neft məhsullarının ixracının stimullaşdırılması ilə bağlı aparılan işlər sahibkarlığın daha da inkişafına və xarici investisiyaların cəlb edilməsinə, qeyri-neft ixracının artırılmasına səbəb olacaq. Bu da həm regionların, həm də, ümumilikdə, qeyri-neft sektorunun inkişafına güclü təkan verəcək.
Tədbirdə Milli Məclisin deputatı Kamran Nəbizadə, “Kapital Bank” ASC-nin İdarə Heyətinin sədr müavini Yaşar Məmmədov çıxışlarında ölkədə sahibkarlıq haqqında qəbul olunan qərarlardan, iş adamlarına verilən subsidiya və kreditlərdən söhbət açıblar.
Sonra Türkiyənin Qida, Əkinçilik və Heyvandarlıq Nazirliyinin nümayəndəsi Burhan Erenoğlu qardaş ölkənin qida və kənd təsərrüfatı sahəsindəki təcrübəsini azərbaycanlı iş adamları ilə bölüşüb.
Daha sonra regionda sahibkarlıq fəaliyyəti ilə məşğul olan iş adamları müəssisələri haqqında ətraflı məlumat veriblər.
Forumda sahibkarlara dövlət qayğısından söhbət açılıb, onların qarşılaşdıqları problemlərin həlli yolları müzakirə edilib.