İDMAN
BAKIDA MOTOBOL OYUNU VƏ MOTO-ŞOU KEÇİRİLMİŞDİR
AZƏRTAC xəbər verir ki, iyulun 6-da Azərbaycan Motosiklet İdmanı Federasiyası və “Avtomobil.az” qəzetinin birgə təşkilatçılığı ilə Milli Olimpiya Komitəsinin yaradılmasının 15-ci ildönümünə həsr olunmuş Moto-şou adlı əyləncəli idman tədbiri keçirilmişdir.
Tofiq Bəhramov adına Respublika stadionunun qarşısında keçirilən tədbirdə 30-dək motosikletçi öz bacarığını nümayiş etdirmişdir.
Tədbirin açılışında çıxış edən Azərbaycan Motosiklet İdmanı Federasiyasının prezidenti Kür Səfərəliyev və digərləri bildirmişlər ki, əyləncəli oyunu keçirməkdən əsas məqsəd ölkəmizdə motosiklet idmanını təbliğ etmək, habelə, gənclərin asudə vaxtlarının səmərəli təşkilinə kömək göstərməkdir.
Tədbir çərçivəsində veteranlardan ibarət “Bakı” və əsasən gənclərdən təşkil olunmuş “Ümid” komandaları arasında motobol oyunu keçirilmişdir. Fasilə zamanı isə Fövqəladə Hallar Nazirliyinin çevik xilasetmə alayının, eləcə də Bakının digər klublarının motosikletçilərinin nümayiş etdirdikləri ustalıq tamaşaçıları heyrətə gətirmişdir.
Tədbirdə, həmçinin, müxtəlif əyləncəli müsabiqələr təşkil edilmiş və test yürüşlər keçirilmişdir.
Sonda fərqlənmiş motosikletçilərə qiymətli hədiyyələr təqdim olunmuşdur.