“CƏMİYYƏT VƏ DİN” QƏZETİNİN İLK NÖMRƏSİ ÇAPDAN ÇIXMIŞDIR
Bakı, 7 may (AZƏRTAC). Dini Qurumlarla İş üzrə Dövlət Komitəsinin təsis etdiyi “Cəmiyyət və din” qəzetinin ilk nömrəsi nəfis şəkildə çapdan çıxmışdır. Media ailəsinin yeni üzvü ideya-siyasi istiqaməti və mövzu baxımından fərqli qəzetdir. Respublikamızda dövlət-din münasibətlərini tənzimləyən hüquqi bazanın təbliğində, müxtəlif din və mədəniyyət mənsubları arasında qarşılıqlı anlaşmanın və dini-etnik dözümlük prinsiplərinin qorunub saxlanılmasında, inam və imanla bağlı cəmiyyətdaxili sosial-siyasi dəyərlərin işıqlandırılmasında mətbu sözdən layiqincə istifadə etmək qəzetin əsas qayəsidir.
Əlamətdar haldır ki, hər həftənin cümə axşamı, iri formatlı, səkkiz səhifəlik rəngli qəzetin ilk nömrəsi ümummilli liderimiz Heydər Əliyevin anadan olduğu gün və Heydər Əliyev Fondunun fəaliyyətinin beşinci ili ərəfəsində çapdan çıxmışdır. Bu münasibətlə qəzetin ilk nömrəsində Hidayət Orucovun “Ulu öndər milli mənəvi dəyərlər işığında” məqaləsi, Dövlət Komitəsi kollektivinin Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya ünvanladığı təbriki və Fondun beş illik fəaliyyətindən bəhs edən irihəcmli yazını dərc etmişdir.
“Quran dərsləri”, “Din tarixi”, “İslam mədəniyyəti paytaxtları”, “Tarix. Maarif” və digər maraqlı rubrikalarla verilmiş müxtəlif janrlı yazılarda isə Şərq dünyasının, o cümlədən ölkəmizin bəşər sivilizasiyasına bəxş etdiyi mənəvi dəyərlərin elmi-kütləvi şəkildə təqdiminə geniş yer ayrılmışdır. Qəzetdə Qafqaz Müsəlmanları İdarəsinin sədri şeyxülislam Allahşükür Paşazadənin, Rus Pravoslav Kilsəsinin Bakı və Xəzəryanı bölgə yeparxiyasının yepiskopu Aleksandr atanın, Azərbaycanın Dağ Yəhudiləri İcmasının sədri Semyon İxiilovun “Cəmiyyət və din” qəzetinin ilk nömrəsinin çapdan çıxması münasibətilə Dövlət Komitəsinin kollektivinə göndərdikləri səmimi təbriklərlə yanaşı, xalq yazıçısı Anarın “Din - mədəniyyətdir” təbrik-məqaləsi də verilmişdir.