Azərbaycanın Müstəqillik Günü Brüsseldə qeyd edilib
Brüssel, 29 may, AZƏRTAC
28 May - Müstəqillik Günü münasibətilə Azərbaycanın Belçikadakı Səfirliyində rəsmi qəbul təşkil olunub.
AZƏRTAC xəbər verir ki, tədbirdə Azərbaycanın Belçika və Lüksemburqdakı səfiri, ölkəmizin Avropa İttifaqı yanında Nümayəndəliyinin rəhbəri Vaqif Sadıqov və Azərbaycan Respublikasının NATO yanında Nümayəndəliyinin rəhbəri səfir Cəfər Hüseynzadə çıxış ediblər.
Səfir Vaqif Sadıqov çıxışında müsəlman Şərqinin ilk demokratik respublikası olan Azərbaycan Xalq Cümhuriyyətinin tarixi əhəmiyyətini vurğulayıb, dövlətçiliyimizin formalaşmasında mühüm xidmətləri olmuş şəxsiyyətlərin xatirəsini ehtiramla yad edib. O, həmçinin Azərbaycanın suverenliyi və ərazi bütövlüyü uğrunda canlarını fəda etmiş şəhidlərin əziz xatirəsinin daim hörmətlə anıldığını söyləyib.
Səfir Vaqif Sadıqov beynəlxalq münasibətlər sistemində artan geosiyasi qeyri-müəyyənlik fonunda diplomatiyanın və çoxtərəfli əməkdaşlığın əhəmiyyətinin daha da artdığını diqqətə çatdırıb. Bu çərçivədə o, Azərbaycanın mühüm beynəlxalq tədbirlərə uğurla ev sahibliyi etdiyini bildirib. Bakıda keçirilmiş BMT-nin Ümumdünya Şəhərsalma Forumunun 13-cü Sessiyasının beynəlxalq ictimaiyyət tərəfindən yüksək qiymətləndirildiyini qeyd edən səfir, bunun Azərbaycanın etibarlı tərəfdaş kimi nüfuzunu bir daha nümayiş etdirdiyini vurğulayıb.
Regional proseslərə toxunan səfir Azərbaycan ilə Ermənistan arasında münasibətlərin normallaşdırılması istiqamətində əldə olunmuş irəliləyişin tarixi əhəmiyyət daşıdığını bildirib. O, iki ölkə arasında sülhün və dövlətlərarası münasibətlərin təsis olunmasına dair sazişin paraflanmasının regionda davamlı sülh və əməkdaşlıq üçün yeni imkanlar açdığını qeyd edib.
Səfir Vaqif Sadıqov daha sonra Azərbaycan-Avropa İttifaqı və Azərbaycan-Belçika münasibətlərinin dinamik inkişaf etdiyini vurğulayıb. Avropa İttifaqının Azərbaycanın ən böyük xarici sərmayədarı olduğunu bildirən səfir, ənənəvi enerji sahəsi ilə yanaşı, bərpa olunan enerji, nəqliyyat, logistika və rəqəmsal transformasiya kimi strateji istiqamətlərdə əməkdaşlığın genişləndirildiyini diqqətə çatdırıb.
Azərbaycanın NATO yanında Nümayəndəliyinin rəhbəri səfir Cəfər Hüseynzadə çıxışında müstəqilliyin qorunmasının güclü dövlət institutları və etibarlı müdafiə imkanları tələb etdiyini vurğulayıb. Bildirib ki, Ümummilli Lider Heydər Əliyevin rəhbərliyi ilə həyata keçirilmiş siyasi və hərbi islahatlar Prezident İlham Əliyevin rəhbərliyi altında yeni mərhələyə qədəm qoyub, nəticədə Azərbaycanın beynəlxalq səviyyədə tanınmış sərhədləri daxilində suverenliyi və ərazi bütövlüyü tam bərpa edilib.
Səfir Cəfər Hüseynzadə münaqişənin başa çatmasının və regionda sülhün təmin edilməsinin Azərbaycanın beynəlxalq arenada daha fəal rol oynamasına imkan yaratdığını qeyd edib. O, Azərbaycanın Cənubi Qafqaz, Mərkəzi Asiya, Yaxın Şərq və Qara dəniz regionlarını birləşdirən unikal geosiyasi mövqeyinin, enerji resurslarının və tranzit potensialının ölkəmizə müstəqil və çoxşaxəli xarici siyasət yürütmək imkanı verdiyini vurğulayıb.
Tədbirin mədəni hissəsində Avropa ölkələrində yaşayan peşəkar azərbaycanlı musiqiçilər və rəqqaslar, eləcə də Belçikada yaşayan Azərbaycan icmasının gənc nümayəndələri çıxış ediblər, qonaqlara Azərbaycan milli mətbəxinin nümunələri təqdim olunub. Tədbir çərçivəsində Belçikada yaşayan azərbaycanlı rəssam və heykəltəraş Ramin Badzjarın sərgisi açılıb.
Qəbulda Belçika Xarici İşlər Nazirliyinin və Avropa İttifaqının nümayəndələri, Brüsseldə akkreditə olunmuş diplomatik korpusun üzvləri, NATO nümayəndələri, elm, incəsənət və media təmsilçiləri, eləcə də Azərbaycan icmasının üzvləri iştirak ediblər.
Vüqar Seyidov
Bölmənin digər xəbərləri
