Prezidentin Qarabağa səfəri “Böyük Qayıdış” Proqramının uğurla davam etdirildiyini göstərir - ekspert rəyi
Bakı, 30 may, AZƏRTAC
Prezident İlham Əliyevin Qarabağ və Şərqi Zəngəzura son səfərinin rəsmi tərəfi bölgədə həyata keçirilən infrastruktur layihələrinin gedişi ilə tanış olmaq, yeni obyektlərin açılışını etmək, sosial-iqtisadi proqramların icrasına baxış keçirmək idi. Bölgəyə səfərlərin mütəmadi şəkildə həyata keçirilməsi göstərir ki, işğaldan azad edilmiş regionların bərpası dövlət siyasətinin prioritetlərindən biri olaraq qalır və Prezident bu prosesi nəzarətdə saxlayır.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib. O bildirib ki, səfərin əhəmiyyəti yalnız infrastruktur layihələrinə baxışla məhdudlaşmır, həm də verdiyi rəmzi mesajlar baxımından əhəmiyyət kəsb edir.
“Qarabağa edilən hər bir səfər Azərbaycanın suverenliyinin və ərazi bütövlüyünün praktik təzahürüdür. Vaxtilə işğal və dağıntılarla gündəmə gələn məkanlarda bu gün yeni sosial obyektlərin istifadəyə verilməsi, quruculuq prosesinin vüsət alması göstərir ki, Azərbaycan münaqişə mərhələsini geridə qoyaraq bölgədə bərpa və quruculuq mərhələsinə keçib. Qarabağ artıq keçmiş münaqişənin simvolu deyil: müstəqil, suveren, inkişaf edən Azərbaycanın rəmzidir. Prezident İlham Əliyevin Qarabağ və Şərqi Zəngəzur regionlarına son səfərinin məhz 28 May - Müstəqillik Günündə həyata keçirilməsi bu rəmzi mənanı daha da qüvvətləndirir”,- deyə M. Ələsgərli vurğulayıb.
Ekspert əlavə edib ki, Müstəqillik Günü Azərbaycan dövlətçiliyinin və milli suverenliyinin rəmzidirsə, Qarabağ həmin suverenliyin tam şəkildə təmin edilməsinin ən parlaq göstəricisidir.
Səfər çərçivəsində Prezidentin yerli sakinlərlə səmimi söhbətləri də xüsusi diqqət çəkdi. Bu cür səmimi görüşlər “Böyük Qayıdış” Proqramının yalnız infrastruktur quruculuğundan ibarət olmadığını, onun mərkəzində vətəndaş amilinin dayandığını nümayiş etdirir. Uzun illər doğma yurdlarına qayıtmaq arzusu ilə yaşayan insanların bu gün öz evlərində dövlətimizin başçısı ilə görüşməsi və gündəlik həyatları barədə fikir mübadiləsi aparması postmünaqişə dövrünün ən təsirli mənzərələrindən biridir. Bu, eyni zamanda, dövlətimizin başçısı ilə vətəndaş arasında formalaşan etimadın göstəricisidir.
Bütün bunlara əsaslanaraq deyə bilərik ki, Prezident İlham Əliyevin Qarabağa son səfəri dövlət suverenliyinin möhkəmləndirilməsi, “Böyük Qayıdış” Proqramının uğurla davam etdirilməsi və regionun yeni inkişaf modelinin təqdimatı baxımından böyük əhəmiyyət daşıyır.
Bölmənin digər xəbərləri
