Münxen aeroportu dron təhlükəsi ilə əlaqədar müvəqqəti bağlanıb
Berlin, 30 may, AZƏRTAC
Almaniyanın Münxen şəhərinin hava limanında pilotsuz uçuş aparatının (PUA) müşahidə edilməsinə dair məlumatla əlaqədar uçuşlar təxminən bir saat müddətinə dayandırılıb.
AZƏRTAC “Spiegel” nəşrinə istinadla xəbər verir ki, səhər saatlarında iki pilot hava limanı yaxınlığında şübhəli obyekt gördüklərini bildirib. Obyektin dron ola biləcəyi ehtimal edildiyindən Münxen hava limanının uçuş-enmə zolaqları müvəqqəti bağlanıb.
Hadisə ilə bağlı araşdırma aparılıb, axtarış tədbirlərinə polis helikopteri də cəlb olunub. Lakin mümkün dronun izinə rast gəlinməyib. Yoxlamalar başa çatdıqdan sonra hava limanında uçuşların həyata keçirilməsi bərpa olunub.
Müvəqqəti məhdudiyyətlər hava nəqliyyatının işinə təsir göstərib. Bağlanma dövründə bir neçə reys Ştutqart hava limanına yönləndirilib. Bəzi təyyarələr isə Nürnberq və Frankfurta eniş etməli olub. Sərnişinlərə sonrakı reyslərdə gecikmələrin mümkün olduğu barədə xəbərdarlıq edilib.
Qeyd edək ki, ötən il də Münxen hava limanı ətrafında bir neçə dəfə dron müşahidə olunmuş, bunun nəticəsində uçuşlar dayandırılmışdı. Həmin vaxt Bavariya hökumətinin müraciətindən sonra Almaniya Silahlı Qüvvələri də dronlara qarşı mübarizə tədbirlərinə dəstək vermişdi.
Bölmənin digər xəbərləri
