YUNESKO TEKİLANI QORUYACAQ

15.07.2006 [20:00]
Çap et
A⁺ A^-

AZƏRTAC YUNESKO-nun saytına istinadla xəbər verir ki, Meksikanın mavi aqava, tekila istehsalı üçün istifadə olunan xammal plantasiyalarını bu təşkilat Dünya irsi obyektləri siyahısını daxil etmişdir və onlar qorunmalıdır. Özü də, təkcə aqava yetişdirlən tarlalar deyil, populyar alkoqollu içkinin istehsal edildiyi yerli zavodlar da mühafizə olunacaqdır.

YUNESKO ekspertlərinin fikrincə, Tekila vulkanının ətəkləri ilə Rio Qrande çayı vadisi arasındakı ərazi nadir tarixi landşaftdır. Burada İspaniya istilasından əvvəlki və müstəmləkə dövrləri memarlığının misilsiz nümunələri, habelə aqavadan qədim kustar üsulla içkilər istehsal edən müəssisələr saxlanılmışdır.

Dünya irsi siyahısına Meksika plantasiyaları ilə yanaşı, daha 19 obyekt salınmışdır. Onların arasında baxımsız qalan Syuell şəhəri (Çili), Genuyadakı Rolli sarayları, dünyada ən böyük mixi yazılarının saxlandığı Behistun rayonu (İran), İspaniyanın Bilbao vilayətindəki Biskay körpüsü, Vrotslavdakı Yüzillik zalı (Polşa) da var.

YUNESKO Afrikaya xüsusi diqqət yetirmişdir. Qitənin eyni zamanda beş təbiət-mədəniyyət obyekti Dünya irsi siyahısına daxil edilmişdir.