Masallıda Məhərrəm ayının başlanması ilə əlaqədar qarşıda duran vəzifələr müzakirə olunub
Masallı, 21 avqust, Bağır Əliyev, AZƏRTAC
Masallıda Məhərrəm ayının başlanması ilə əlaqədar keçirilən videomüşavirədə qarşıda duran vəzifələr müzakirə edilib.
Onlayn tədbirdə Masallı Rayon İcra Hakimiyyəti aparatının əməkdaşları, rayonun hüquq-mühafizə orqanlarının, idarə və müəssisələrin rəhbərləri, Milli Məclisin deputatları, ərazi üzrə nümayəndələri, bələdiyyə sədrləri, məktəb direktorları və məktəbəqədər təhsil müəssisələrinin rəhbərləri, dini icma sədrləri və imamları, fəal gənclər və ictimaiyyətin nümayəndələri iştirak ediblər.
AZƏRTAC-ın bölgə müxbirinin verdiyi məlumata görə, videomüşavirədə qeyd olunub ki, ölkəmizdə koronavirus pandemiyası ilə mübarizə çərçivəsində görülən tədbirlərdən biri insanların kütləvi şəkildə toplanmasının qarşısının alınmasıdır. Prezident İlham Əliyevin, Birinci vitse-prezident Mehriban xanım Əliyevanın rəhbərliyi və diqqəti sayəsində vətəndaşlarımızın sağlamlığının qorunması üçün bütün lazımi tədbirlər görülür.
Diqqətə çatdırılıb ki, Nazirlər Kabinetinin qərarı ilə avqustun 31-dək Azərbaycanda tətbiq edilən xüsusi karantin rejimi dövründə kütləvi tədbirlərin, o cümlədən dini ayinlərin keçirilməsi, ictimai və digər yerlərdə şəxslərin 5-10 nəfərdən artıq qruplarda cəmləşməsi qadağan edilib, məscidlərin fəaliyyəti dayandırılıb. Pandemiya şəraitində Məhərrəm ayında, o cümlədən “Aşura” günündə məscid və ziyarətgahlarda, eləcə də ayrı-ayrı evlərdə toplaşmaq yolverilməzdir.
Məscidlərdə azan QMİ-nin təqviminə əsasən verilməli, xüsusi karantin rejimi ilə bağlı Məhərrəm ayında müqəddəs pir və ocaqlardakı ziyarətlərə azyaşlı və məktəblilərin cəlb edilməsinin qarşısı alınmalıdır.
Bildirilib ki, Məhərrəm ayında, eləcə də yas mərasimlərində təziyə ehsanı olaraq imkansız ailələrə ərzaq yardımı etmək, ehtiyacı olan xəstələr üçün qan verilməsi bəyənilən əməldir. Məhərrəmlik mərasimlərində, yas məclislərində kütləvi toplaşmalara yol verilməməlidir. Ərazi nümayəndəlikləri və bələdiyyələr, dindarlar və digər nüfuzlu şəxslər bu məsələyə ciddi yanaşmalıdırlar.
Onlayn tədbirdə Milli Məclisin deputatları Anar İsgəndərov və Məşhur Məmmədov, Masallı rayon prokuroru Vəli Mustafayev, Rayon Polis Şöbəsinin rəisi Habil Əmiraslanov, Dövlət Təhlükəsizlik Xidmətinin Masallı rayon şöbəsinin rəisi Emin Süleymanov, Dini Qurumlarla İş üzrə Dövlət Komitəsinin Masallı bölgəsi üzrə şöbəsinin sədri Miryəhya Bədirov, Masallı şəhər “Cümə” məscidi dini icmasının sədri Mirqabil Hüseynov, Boradigah qəsəbə məscidinin imamı Rəşid Talıbov, Sığdaş kənd məscidi dini icmasını sədri Hümmət Cəfərov, “Seyid Sadıq Ağa” ziyarətgahının rəhbəri Mirvaleh Bəşirov, Təzə Alvadı kənd məscidi dini icmasının sədri Ağamirzə Hüseynov və başqaları mövzu ilə bağlı çıxış ediblər. Çıxışlarda Məhərrəm ayının fəzilətlərindən, İmam Hüseynin həyat və mübarizə yolunun fəlsəfi mahiyyətindən, böyük mənəvi-əxlaqi əhəmiyyətindən danışılıb. Bildirilib ki, hazırkı pandemiya dövründə tətbiq olunan məhdudiyyətlərə ciddi əməl olunmalıdır. Bu məhdudiyyətlərin məqsədi koronovirusun geniş yayılmasının qarşısının alınması və əhalinin sağlamlığının qorunmasından ibarətdir.
Bölmənin digər xəbərləri
