Ulu Öndərin irsi təkcə keçmişin xatirəsi deyil, gələcəyin yol xəritəsidir - ŞƏRH
Bakı, 9 may, AZƏRTAC
Azərbaycan xalqı Ümummilli Lider Heydər Əlirza oğlu Əliyevin anadan olmasının 103-cü ildönümünü bu il dərin ehtiram, sonsuz minnətdarlıq və böyük qürur hissi ilə qeyd edir. 10 may 2026-cı il sadəcə təqvim tarixi deyil, Azərbaycanın müasir dövlətçiliyinin təməlinin qoyulduğu, xalqımızın taleyində əbədi dönüş yaradan dahi şəxsiyyətin, Ulu Öndərin və xalq atasının əzəmətli xatirəsinin günüdür.
Bu sözləri AZƏRTAC-a açıqlamasında Naxçıvan Muxtar Respublikası Ali Məclisinin deputatı Canməmməd Canməmmədov deyib.
O bildirib ki, bu ildönümü respublikanın hər yerində və xarici ölkələrdə — konfranslar, elmi sessiyalar, konsertlər və sərgilərlə geniş qeyd olunur: “Ümummilli Lider zəngin zəka məbədi, polad iradə timsalı, uzaqgörən dahi siyasətçi və xalqına canından artıq bağlı əvəzolunmaz şəxsiyyət kimi Azərbaycan tarixinə qızıl harflərlə həkk olunub. Onun adı bu gün ölkəmizin hər daşında, hər qarış torpağında, hər bir azərbaycanlının qəlbində və ruhunda əbədi yaşamaqdadır. Ulu Öndər Azərbaycan dövlətçiliyinin ən böyük memarı, xalqımızın azadlıq və tərəqqi yolunun banisi kimi hər zaman xatırlanacaq.1923-cü il mayın 10-da Naxçıvanda dünyaya gələn Ümummilli Lider dövlət idarəçiliyi sahəsində fəaliyyətə təhlükəsizlik orqanlarında başlayıb, 1967-ci ildə Azərbaycan SSR Dövlət Təhlükəsizliyi Komitəsinin sədri vəzifəsinə yüksəlib. 1969-cu il iyulun 14-də Azərbaycan Kommunist Partiyası Mərkəzi Komitəsinin Birinci katibi seçilməsi respublikanın inkişaf tarixində yeni və şanlı mərhələnin başlanğıcı oldu. O dövrdə Azərbaycan SSRİ-nin geridə qalmış aqrar regionlarından biri hesab olunsa da, Ulu Öndərin qüdrətli rəhbərliyi, dərin zəkası və vətənpərvərliyi sayəsində respublika sürətlə dirçəldi. Sənayeləşmə geniş vüsət aldı, neft sənayesi yenidən canlandı, Bakı incilər kimi abadlaşdı, 250-dən çox yeni zavod, fabrik, məktəb, universitet və mədəni mərkəzlər ucaldıldı. Milli kadr siyasəti gücləndirildi, elm və təhsilə xüsusi qayğı göstərildi, azərbaycançılıq ideyası elmi və mədəni əsaslarla zənginləşdirildi. Bu illərdə sənaye müəssisələrinin əsas fondlarının 69 faizi yeniləndi, əmək məhsuldarlığı əhəmiyyətli dərəcədə artdı”.
Deputat qeyd edib ki, 1982-ci ildə SSRİ Nazirlər Soveti sədrinin birinci müavini vəzifəsinə təyin olunması və Sov.İKP Siyasi Bürosunun üzvü seçilməsi Ulu Öndərin ittifaq miqyasında yüksək nüfuzunun bariz göstəricisi idi: “Bu, azərbaycanlı siyasi xadimin SSRİ-nin ən ali hakimiyyət strukturlarında təmsil olunmasının nadir və tarixi hadisəsi kimi qiymətləndirilir. 1990-cı illərin əvvəllərində müstəqilliyini bərpa edən Azərbaycan ağır siyasi böhran, iqtisadi kollaps, daxili qarşıdurmalar və Ermənistanın hərbi təcavüzü ilə üzləşmişdi. Məhz bu ən qara və taleyüklü günlərdə xalqın təkidi və səsi ilə 1993-cü il iyunun 15-də Ümummilli Liderin Naxçıvandan Bakıya qayıdışı ölkəmiz üçün həqiqi xilaskarlıq missiyası oldu. Qısa müddət ərzində ictimai-siyasi sabitlik bərpa edildi, silahlı dəstələr tərksilah olundu, dövlətçilik institutları möhkəmləndirildi, 1994-cü il mayın 12-də atəşkəsə nail olundu və Azərbaycan beynəlxalq ailəyə ləyaqətli şəkildə qayıtdı. Dahi şəxsiyyətin ən böyük strateji zəkası və uzaqgörənliyi enerji siyasətində də öz parlaq təcəssümünü tapdı. 1994-cü il sentyabrın 20-də imzalanan “Əsrin müqaviləsi” Azərbaycanı dünya enerji xəritəsinə qızıl hərflərlə həkk etdi. “Azəri-Çıraq-Günəşli” yataqlarının işlənməsi və Bakı-Tbilisi-Ceyhan neft kəməri kimi nəhəng transmilli layihələr ölkəmizi regional enerji təhlükəsizliyinin və iqtisadi inkişafın strateji aktoruna çevirdi. Bu siyasət nəticəsində Azərbaycan beynəlxalq investisiyaların əsas məkanı halına gəldi, on minlərlə yeni iş yeri yarandı, infrastruktur yenidən quruldu. Ulu Öndərin xarici siyasət kursu praqmatizm, balanslaşdırılmış yanaşma və milli maraqların qorunmasına əsaslanırdı. Qərblə enerji əməkdaşlığı, Rusiya və Türkiyə ilə strateji tərəfdaşlıq, beynəlxalq təşkilatlara (BMT, ATƏT, Avropa Şurası və NATO proqramları) uğurlu inteqrasiya Azərbaycanın beynəlxalq arenadakı nüfuzunu əhəmiyyətli dərəcədə artırdı”.
"Bu gün dahi şəxsiyyətin siyasi kursu Prezident İlham Əliyev tərəfindən uğurla davam etdirilir. 2020-ci il Vətən müharibəsində qazanılmış Zəfər, ərazi bütövlüyünün tam bərpası və Azərbaycanın regional supergücə çevrilməsi Ümummilli Liderin qoyduğu möhkəm təməllərin məntiqi nəticəsidir. Ulu Öndərin həyatı Vətənə sonsuz xidmətin, zəka işığının, polad iradənin və böyük dövlətçilik əzəmətinin əbədi dastanıdır. Onun sayəsində Azərbaycan qaranlıqdan işığa, zəiflikdən qüdrətə, asılılıqdan suveren gücə yüksəldi. 103-cü ildönümü kontekstində Ulu Öndərin irsi təkcə keçmişin xatirəsi deyil, gələcəyin yol xəritəsidir. Onun ideyaları və əməlləri xalqımıza yeni qələbələr və yüksəlişlər üçün tükənməz ilham mənbəyi olaraq qalacaq. Ümummilli Lider Heydər Əliyevin əziz xatirəsi qəlblərdə əbədi yaşayacaq, onun müdrik ideyaları və quruculuq ənənələri isə Azərbaycanı hər zaman qələbədən-qələbəyə, uğurdan-uğura aparacaq. Bu gün biz Ulu Öndərin işıqlı yolunu davam etdirərək, onun arzularını gerçəkləşdirmək üçün daha böyük əzm və birlik içində çalışırıq. Çünki Heydər Əliyev siyasəti yalnız keçmişin zirvəsi deyil, gələcəyimizin ən etibarlı təminatıdır", - deyə C.Canməmmədov bildirib.
Bölmənin digər xəbərləri
