İDMAN
Onni Kohen: Turnirin Xəzər dənizinin sahilində keçirilməsi çox həyəcanlıdır
Bakı, 15 iyul, AZƏRTAC
Azərbaycanda olmaqdan çox məmnunam. Bakıda yeni dostlar qazandım. Ümid edirəm ki, yenidən ölkənizə qayıdacağam.
AZƏRTAC xəbər verir ki, bu sözləri Bakıda futvolley üzrə açıq beynəlxalq turnirin iştirakçısı portuqaliyalı Onni Kohen deyib.
Portuqaliya təmsilçisi bildirib ki, turnirin Xəzər dənizinin sahilində keçirilməsi çox həyəcanlıdır. Bakının “Küləklər şəhəri” olduğunu öncədən bilirdim. Görüşlər maraqlı keçir və külək oyunumuza o qədər də təsir göstərmir. Rəqiblər çox güclüdür. Dünyanın ən güclü futvolleyçiləri Bakıda bir araya toplaşıblar.
“Azərbaycan zəngin mədəniyyətə malikdir. İnsanlar çox qonaqpərvər və istiqanlıdırlar. Mətbəxiniz isə mükəmməldir. Çox ləzzətli təamlarınız var”, - deyə Onni Kohen əlavə edib.
Qeyd edək ki, turnirdə 8 milli komanda medal uğrunda mübarizə aparır.