® “Azercell”in əməkdaşları bilik və təcrübələrini tələbələrlə bölüşüb
Şirkət “Qış Məktəbi” layihəsində “SABAH tələbələri”nə dəstək olub
Azərbaycanda gənclərin peşəkar və fərdi inkişafına daim dəstək olan, Korporativ Sosial Məsuliyyət strategiyasında təhsilin inkişafına töhfə verən “Azercell Telekom” MMC Təhsil Nazirliyi “SABAH” Qrupları Karyera Akademiyası proqramı çərçivəsində daha bir layihəyə dəstək verib. Belə ki, fevralın 12-14-də Qubada təşkil edilmiş “SABAH Karyera Qış Məktəbi”ndə “Azercell” şirkətinin əməkdaşları tələbələrə təlimlər keçib, bilik və təcrübələrini onlar ilə bölüşüblər.
“Azercell Akademiyası”nın peşəkar təlimçiləri Vahidə Orucova, Sevinc Teymurova və Ceyhun Süleymanov “Təqdimat Bacarıqları” və “Karyera brendini yarat” mövzusunda təşkil olunmuş master-klassda tələbələrin qarşısında çıxış ediblər. İki gün davam edən təlimin sonunda iştirakçılara sertifikatlar təqdim olunub. Onu da bildirək ki, “Azercell” əməkdaşları 2017-ci və 2018-ci illərdə təşkil olunan “SABAH Karyera Qış Məktəbi” layihəsində fəal iştirak ediblər. Ötən illərdə olduğu kimi, bu il də təlimlərdə əsas istiqamət karyera quruculuğu üzrə fundamental bacarıqların inkişafı olub.
Qeyd edək ki, 2017-ci ildə Təhsil Nazirliyi “SABAH” qrupları və “Azercell Telekom” MMC arasında memorandum imzalanıb. Memoranduma əsasən, “Azercell” şirkəti tərəfindən təşkil edilən Tələbə Təqaüd Proqramı və Təcrübə Proqramı çərçivəsində Təhsil Nazirliyinin “SABAH” qrupları tələbələri üçün hər il xüsusi yerlər ayrılır. Belə ki, Tələbə Təqaüd Proqramının 2019-cu il üzrə 25 qalibindən 9-u, məhz “SABAH” qruplarının tələbələri olub. Qaliblər ali təhsillərinin sonunadək “Azercell”dən 200 AZN məbləğində aylıq təqaüd almaqla yanaşı, telekommunikasiya sahəsi haqda biliklərini artırmaq, şirkətin korporativ tədbirlərinə dəvət almaq, müxtəlif təlimlərdə, məlumat sessiyalarında və kurslarda iştirak etmək imkanını əldə edəcəklər. Əlavə olaraq, son 2 ildə 25 “SABAH tələbəsi” “Azercell”in Tələbə Təcrübə Proqramı çərçivəsində təcrübə keçmək imkanın qazanıb. Onlardan biri isə artıq “Azercell” ailəsinə qoşulub.
Məlumat üçün bildirək ki, Təhsil Nazirliyi “SABAH qrupları” ali təhsil sistemində yeni və fərqli bir mühitin yaradılması, tədrisin keyfiyyətinin yüksəldilməsi, savadlı, bacarıqlı və hazırlıqlı tələbə yetişdirilməsi, əmək bazarının artan tələblərinə müvafiq olaraq kadr hazırlığının təmin edilməsi məqsədilə yaradılıb, ali təhsil sistemində innovativ və aparıcı bir layihədir.
Daha ətraflı məlumat üçün [email protected] ünvanına müraciət edə bilərsiniz.
Azərbaycanın mobil rabitə sektorunun lideri, qeyri-neft sektorunun ən böyük vergiödəyicisi və sərmayəçisi “Azercell Telekom” MMC 1996-cı ildə təsis edilib. Azərbaycanın mobil rabitə sektorunda 48 faiz bazar payına malik olan “Azercell”in şəbəkəsi ölkə ərazisinin 80 faizini (işğal altında olan 20 faiz ərazi istisna olmaqla), əhalinin isə 99,8 faizini əhatə edir. Hazırda 4,5 milyon abunəçi “Azercell”in xidmətlərindən istifadə edir. Ölkəyə bir sıra yenilikləri ilk dəfə olaraq məhz “Azercell” gətirib: GSM texnologiyası, öncədən ödəmə sistemi, mobil internet xidmətləri, metropoliten ərazisində şəbəkənin qurulması, 24/7 Telefon Mərkəzi, həftənin 7 günü fasiləsiz ön ofis xidmətləri, M2M xidmətləri, 1 nöqtədə 3 xidmət göstərən “Azercell Ekspres” ofisləri, mobil müştəri xidmətləri, onlayn müştəri xidmətləri və sosial media üzərindən müştəri xidmətləri, mobil elektron imza xidməti “Asan İmza” və sair. 2012-ci ildə “Azercell” ölkədə ilk dəfə 4G xidmətini təqdim edib. Radio siqnalların şəbəkə keyfiyyətini ölçən və simsiz rabitənin əhatə dairəsi üzrə ixtisaslaşan beynəlxalq sistemlər tərəfindən aparılmış araşdırmaların nəticələrinə əsasən, “Azercell” şəbəkəsi Azərbaycanın mobil operatorları arasında ən yüksək göstəricilər nümayiş etdirib. “Azercell” ölkədə və MDB məkanında beynəlxalq “Investors In People” İnsana Sərmayə “Qızıl Sertifikatı”na layiq görülən yeganə şirkətdir.
Bölmənin digər xəbərləri
