ABŞ-IN SABİQ PREZİDENTİNİN MİLLİ TƏHLÜKƏSİZLİK MƏSƏLƏLƏRİ ÜZRƏ SABİQ MÜŞAVİRİ BRENT SKOUKROFTUN ÇIXIŞI
- Çox hörmətli Prezident Heydər Əliyev!
Hörmətli konfrans iştirakçıları!
Cənab səfir Stiven Mən, səmimi sözlərinizə görə Sizə təşəkkür edirəm.
Mən burada olmaqdan və xüsusilə Azərbaycan Prezidentini bu konfransda salamlamaqdan məmnunluq duyuram. Mən Prezident Heydər Əliyevlə artıq bir neçə ildir ki, tanışam. Ondan əvvəl isə onun reputasiyası barədə məlumatım var idi. Cənab Heydər Əliyev Birləşmiş Ştatlara bir neçə dəfə gəlmişdir. Onu hər dəfə burada görmək bizim üçün çox xoşdur. Əlbəttə, onun heç bir təqdimata ehtiyacı yoxdur, xüsusilə də bu auditoriyaya. Ona görə icazə verin, qısaca yalnız onu xatırladım ki, qeyri-adi bir şəxs, dünya şöhrətli siyasətçi cənab Heydər Əliyev bu gün burada bizimlə birgədir, bir yerdədir.
Prezident Heydər Əliyev fəhlə ailəsində doğulmuş, işgüzar ailə mühitində böyümüşdür. İstedadı, qətiyyəti və işgüzarlığı nəticəsində o, 46 yaşında artıq Azərbaycan Kommunist Partiyasının birinci katibi, respublikanın rəhbəri olmuşdur. O, bu vəzifədən Sovet İttifaqının siyasi səhnəsində öz yerini tutmağa başlamışdı və 1982-ci ildən Moskvada hakimiyyətin ən yuxarı pilləsinə daxil olmuş, Siyasi Büronun üzvü seçilmiş və SSRİ baş nazirinin birinci müavini təyin edilmişdir. Bu, çox təəssüratlandırıcı bir faktdır.
Azərbaycan Sovet respublikaları içərisində ən başı bəlalı respublikalardan biri olmuşdur. Hətta Sovet İttifaqı dağılmamışdan əvvəl də belə idi. Müstəqilliyin ilk illərinə qədər Azərbaycan təlatümlü günlər yaşamışdır. 1993-cü ildə Heydər Əliyev siyasi hakimiyyətə yenidən qayıdaraq, Prezident vəzifəsinə seçilmişdir. Çox hörmətli Heydər Əliyev o vaxtdan bəri daxili ədavətə son qoymuş və ölkəni sabitliyə qaytara bilmişdir.
Nəzərə alsaq ki, Ermənistan-Azərbaycan, Dağlıq Qarabağ münaqişəsi həll olunmamış qalır, onda münaqişənin nəticəsi olan qaçqınlar ölkəyə faciəvi bir yükdür. Prezident Heydər Əliyev son illərdə səylərini ölkənin zəngin neft sərvətlərinin dünyaya açılması kimi çətin vəzifəyə yönəldərək, onu xalqın rifahına istiqamətləndirə bilmişdir. Məhz bu mövzu bugünkü konfransın diqqətindədir. Biz ona, cənab Prezidentə uğurlar arzulayırıq.
Xanımlar və cənablar, xahiş edirəm fəxri qonağımız olan Azərbaycan Prezidenti Heydər Əliyevi bir daha səmimi qəlbdən salamlayaq.
X X X
Azərbaycan Respublikasının Prezidenti Heydər Əliyev konfransda geniş nitq söylədi.
(Dövlətimizin başçısının nitqi qəzetin birinci səhifəsində dərc olunur).
X X X
STİVEN MƏN: Cənab Prezident, çox dəyərli, məntiqli və məzmunlu nitqinizə görə Sizə təşəkkür edirik. Səmimi və dəstəkverici sözlərinizə görə sağ olun.
Prezident Heydər Əliyev razılıq verdi ki, konfransın axırında, çıxışlar qurtarandan sonra bir neçə suala cavab versin.
İndi isə icazə verin, sözü bu layihənin yükünü öz çiyinlərində daşımış adama, Azərbaycan Beynəlxalq Əməliyyat Şirkətinin prezidenti Devid Vudvorda verək.
Bölmənin digər xəbərləri
