AFFA UEFA-YA MƏKTUB ÜNVANLAMIŞDIR
Bakı, 26 dekabr (AZƏRTAC). Məlum olduğu kimi, AFFA tərəfindən futbolçuların süni yaşazaltmasına qarşı ciddi mübarizə aparılır və bu kimi hallar baş verdiyi zaman müvafiq qərarlar qəbul olunur, sanksiyalar tətbiq edilir.
AFFA-nın apardığı növbəti araşdırma zamanı müəyyən olunmuşdur ki, 19 yaşadək qızlardan ibarət yığma komandanın heyətində doğum tarixi yanlış göstərilən futbolçular çıxış etmişlər. Təəssüf ki, həmin futbolçular yığmamızın heyətində Avropa çempionatının ilkin seçmə mərhələ oyunlarında iştirak edmişlər və məlum olduğu kimi, U-19 (qızlar) AÇ-nin elit-raunduna vəsiqə qazanmışlar.
Bu yüksək nailiyyətə baxmayaraq, AFFA beynəlxalq Fair Play qaydalarına və rəqiblərə hörmətlə yanaşaraq, komandanın heyətində yaşı süni olaraq azaldılmış futbolçular çıxış etdiyi üçün U-19-un (qızlar) elit-raundda iştirakdan imtinası ilə bağlı UEFA-ya məktub ünvanlamışdır.
Məsələ ilə bağlı AFFA-nın daxili araşdırması davam edir və müvafiq qərar qəbul olunacaqdır. Futbolçuların adları araşdırma davam etdiyi üçün açıqlanmır.
Bölmənin digər xəbərləri
