AĞ EV AZƏRBAYCAN PREZİDENTİNİN ABŞ-A SƏFƏRİNİ YÜKSƏK QİYMƏTLƏNDİRMİŞDİR
“Azərbaycan Prezidenti ilə görüş səmimilik və mehribanlıq şəraitində keçdi”- Ağ evin mətbuat katibi Ari Fleşer mətbuata açıqlama verərkən ABŞ Prezidenti Corc Buşun Prezident Heydər Əliyev ilə görüşünü belə qiymətləndirmişdir. O, Corc Buşun terrora qarşı müharibədə Amerikaya qəti dəstəyinə görə Azərbaycan Prezidentinə təşəkkür etdiyini bildirmişdir.
Azərbaycan dövləti başçısının Vaşinqtona səfərinə dair daha bir bəyanatı Dövlət departamenti yaymışdır. Dövlət katibinin birinci müavini Riçard Armitac Prezident Heydər Əliyev ilə söhbət zamanı Azərbaycanın antiterror koalisiyasında iştirakını, Əfqanıstanda və İraq məsələsində göstərdiyi dəstəyi yüksək qiymətləndirdiyini bildirmişdir. Cənab Armitac ölkəmizdə aparılan ardıcıl iqtisadi və siyasi islahatları bəyəndiyini vurğulamışdır. Görüş iştirakçıları Dağlıq Qarabağ münaqişəsinin danışıqlar yolu ilə həlli istiqamətində səylərin davam etdiriləcəyini bildirmişlər.
Əsgər İbrahimov,
Şəfəq Akifqızı,
Oqtay Aydınoğlu(foto)
AZƏRTAC-ın xüsusi müxbirləri
Vaşinqton
Bölmənin digər xəbərləri
