Ağdam şəhərində “Dövlət idarəçiliyində innovativ texnologiyalar” mövzusunda səyyar təlim proqramına start verilib
Bakı, 12 fevral, AZƏRTAC
Ağdam şəhərində Azərbaycan Respublikası Prezidenti yanında Dövlət İdarəçilik Akademiyası və “Regional İnkişaf” İctimai Birliyinin birgə təşkilatçılığı ilə “Dövlət idarəçiliyində innovativ texnologiyalar” mövzusunda səyyar təlim proqramına start verilib.
Dövlət İdarəçilik Akademiyasından AZƏRTAC-a verilən məlumata görə, təlim proqramı Qarabağ və Şərqi Zəngəzur iqtisadi rayonlarında fəaliyyət göstərən “Bərpa, Tikinti və İdarəetmə Xidmətləri”nin əməkdaşları üçün nəzərdə tutulub və dövlət idarəçiliyində müasir yanaşmaların, innovativ texnologiyaların tətbiqi sahəsində bilik və bacarıqların artırılmasını hədəfləyir.
Tədbir Dövlət Himninin səsləndirilməsi ilə açıq elan edilib. Açılış mərasimində Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsinin müavini Eldar Seyidov, Dövlət İdarəçilik Akademiyasının rektoru, akademik Urxan Ələkbərov və “Regional İnkişaf” İctimai Birliyinin İctimaiyyətlə əlaqələr və kommunikasiya şöbəsinin müdiri Murad Qasımlı çıxış ediblər. Çıxışlarda dövlət idarəçiliyində innovativ yanaşmaların əhəmiyyəti, işğaldan azad edilmiş ərazilərdə həyata keçirilən bərpa və idarəetmə proseslərində peşəkar kadr potensialının rolu vurğulanıb.
Təlim proqramı çərçivəsində akademik Urxan Ələkbərov tərəfindən keçirilən təlimdə Azərbaycanın müasir dövlət idarəçiliyinin formalaşmasında liderliyin, institusional davamlılığın və innovativ yanaşmaların rolu geniş təhlil olunub, ölkəmizin iqtisadi, texnoloji və idarəetmə potensialının Prezident İlham Əliyevin uzaqgörən siyasəti və ardıcıl islahatları nəticəsində əhəmiyyətli dərəcədə gücləndiyi vurğulanıb. Təlim çərçivəsində dövlət idarəçiliyinin klassik nəzəri əsasları ilə müasir idarəetmə prinsipləri qarşılıqlı müqayisə olunub, Ulu Öndər Heydər Əliyevin müəyyən etdiyi strateji idarəetmə və enerji siyasətinin bu gün Prezident İlham Əliyev tərəfindən innovativ və adaptiv yanaşmalarla uğurla davam etdirildiyi qeyd olunub, dövlət qulluqçularının peşəkar bacarıqlarının artırılması baxımından praktiki əhəmiyyət daşıyan müzakirələr aparılıb.
Proqramın davamında “Azərbaycan Respublikasında dövlət idarəçiliyi islahatları” mövzusunda növbəti təlim keçirilib. Təlim siyasi elmlər üzrə fəlsəfə doktoru, dosent Elnur Əliyev tərəfindən aparılıb. Sessiya zamanı dövlət idarəçiliyində institusional islahatların mərhələləri, normativ-hüquqi baza, şəffaflıq və hesabatlılığın gücləndirilməsi istiqamətində görülən tədbirlər, eləcə də idarəetmədə səmərəlilik və vətəndaş məmnunluğu prinsipləri ətraflı şəkildə izah olunub.
Təlim proqramının ikinci günündə hüquq elmləri doktoru, professor Namiq Əliyev “Dövlət idarəçiliyində protokol qaydaları” mövzusunda çıxış edib. Təlim çərçivəsində dövlət idarəçiliyində rəsmi protokol və etik davranış qaydalarının əhəmiyyəti, rəsmi sənədləşmə prosedurları və tədbirlərin təşkili prinsipləri iştirakçıların diqqətinə çatdırılıb.
Proqramın davamında siyasi elmlər üzrə fəlsəfə doktoru Esmira Osmanova tərəfindən “Dövlət idarəçiliyində komanda quruculuğu” mövzusunda təlim təşkil olunub. Təlim zamanı effektiv komanda modelinin formalaşdırılması, əməkdaşlıq və liderlik bacarıqlarının inkişaf etdirilməsi, həmçinin idarəetmə prosesində qarşılıqlı dəstək və koordinasiyanın rolu üzrə praktiki yanaşmalar təqdim edilib.
Təlim proqramı iştirakçılar tərəfindən məmnunluqla qarşılanıb və uğurla başa çatıb.
Təlim proqramının növbəti mərhələlərinin mart-aprel aylarında davam etdirilməsi nəzərdə tutulur.
Bölmənin digər xəbərləri
