AĞSU RAYONUNDA BAŞ VERMİŞ YANĞIN BÖYÜK QƏZA İLƏ NƏTİCƏLƏNƏ BİLƏRDİ
“Azərenerji” SC–nin mətbuat xidmətindən AZƏRTAC-ın müxbirinə bildirmişlər ki, respublikanın energetika şəbəkəsinin fasiləsiz fəaliyyətini təhlükə qarşısında qoymuş növbəti iri yanğın Ağsu rayonunda olmuşdur. Biçilmiş tarlada baş vermiş yanğın sürətlə 80 hektardan artıq əraziyə yayılmış və Mingəçevirdəki Azərbaycan DRES-dən elektrik enerjisini Bakıya və Abşeron yarımadasına ötürən əsas xəttin - II Abseron elektrikötürmə xəttinin dayaqları yerləşən sahələri bürümüşdür.
Belə mühüm xəttin qapanması ən ağır nəticələrə gətirib çıxara bilərdi. Xəttin işinin avtomatik və əllə bərpa olunmasına cəhd göstərilmişdir. Ağsu şəbəkə rayonunun və yaxınlıqdakı energetika bölmələrinin bütün qüvvələri hadisə yerinə göndərilmişdir. Yanğınsöndürənlər alovu ram etdikdən sonra elektrikötürmə xəttində bərpa işləri başlanmış və o, bir saatdan sonra şəbəkəyə qoşulmuşdur.
Bölmənin digər xəbərləri
