Ağsuda qanvermə aksiyası keçirilmişdir
Ağsu, 24 sentyabr (AZƏRTAC). Ağsu Mərkəzi Rayon Xəstəxanasında qanvermə aksiyası keçirilmişdir.
AZƏRTAC xəbər verir ki, rayon sakinlərinin fəallığı şəraitində davam edən qanvermə aksiyası Səhiyyə Nazirliyinin təşəbbusu ilə B.Eyvazov adına Hematologiya və Transfuziologiya İnstitutunun Mərkəzi Qan Bankı tərəfindən reallaşdırılmışdır.
Qan Bankının bölmə müdiri Gülarə Abbasovanın rəhbərlik etdiyi həkim və orta tibb işçilərindən ibarət briqada könüllü surətdə qan verməyə gələn vətəndaşların hərtərəfli müayinəsi və qan verənlərin istirahəti üçün bütün lazımi şəraiti yaratmışdılar.
Aksiyada 300 nəfərə yaxın könüllü iştirak etmiş, aparılan müayinədən sonra 150 nəfərdən qan götürülmüşdür.
Aksiya talassemiya xəstəliyindən əziyyət çəkən uşaqların ehtiyaclarının ödənilməsi məqsədilə keçirilmişdir. Son 1 ildə Bakı və digər iri şəhərlərdə, habelə rayonlarda qrafik üzrə həyata keçirilən aksiya artıq başa çatmaq üzrədir.
Növbəti qanvermə aksiyası sentyabrın 26-da Şamaxıda keçiriləcəkdir.
Bölmənin digər xəbərləri
