RƏSMİ XRONİKA
AKADEMİK ZƏRİFƏ ƏLİYEVA ADINA AZƏRBAYCAN ELMİ TƏDQİQAT GÖZ XƏSTƏLİKLƏRİ İNSTİTUTUNUN ƏMƏKDAŞLARINA
Sizi – Akademik Zərifə Əliyeva adına Azərbaycan Elmi Tədqiqat Göz Xəstəlikləri İnstitutunun əməkdaşlarını institutunuzun yaradılmasının 60 illiyi münasibətilə səmimi qəlbdən təbrik edirəm.
Ölkənin tanınmış elm və müalicə mərkəzlərindən hesab edilən Göz Xəstəlikləri İnstitutunun bütün fəaliyyəti nəcib bir işə – xalqın sağlamlığının qorunmasına həsr olunmuşdur. Ötən illər ərzində institut müxtəlif göz xəstəliklərinin diaqnostikası, profilaktikası və müalicəsi ilə bağlı dərin elmi araşdırmalar aparmaqla yanaşı, respublikada göz xəstəlikləri üzrə bütün tibb müəssisələrinin təşkilində və bu müəssisələr üçün kadrların hazırlanmasında böyük xidmətlər göstərmişdir. Azərbaycanda bir çox ağır göz xəstəliklərinin qarşısının alınması və aradan qaldırılmasında, ümumiyyətlə, elmi-tibbi mühitin formalaşmasında institutunuzun böyük rolu olmuşdur. Məhz sizin institutun əməkdaşlarının səmərəli tədqiqat işləri və ardıcıl həyata keçirdikləri məqsədyönlü tədbirlər sayəsində son illərdə respublikada təhlükəli göz xəstəliklərinin kökü kəsilmiş, dünya işığına həsrət qalmış yüzlərlə insanın gözlərinə nur gəlmişdir.
Demokratik, hüquqi dövlət quruculuğu yolu ilə inamla irəliləyən müstəqil Azərbaycan keçən əsrin 90-cı illərinin çətinliklərini arxada qoyaraq, ölkə daxilində böyük quruculuq işləri aparır və gündən-günə mövqeyini bütün dünyada möhkəmləndirir. Bu isə öz növbəsində xalqımızın sülh və xoş güzəran, firavanlıq şəraitində yaşamasını təmin edəcəkdir. Şübhə yoxdur ki, həyatın bütün sahələrində dinamik inkişaf mərhələsinə qədəm qoymuş ölkəmiz tibb elminin inkişafı, əhaliyə tibbi xidmətin səviyyəsinin yüksəldilməsi sahəsində də mühüm nailiyyətlər qazanacaqdır. İnanıram ki, bu uğurlar arasında sizin də payınız olacaq və öz şərəfli əməyiniz sayəsində üzərinizə düşən olduqca vacib işin öhdəsindən ləyaqətlə gələcəksiniz.
Əmin olduğumu bildirirəm ki, Ümnisə Musabəyova, Zərifə Əliyeva, Nazim Əfəndiyev, Zəhra Quliyeva kimi görkəmli alim və həkimlər yetirmiş Azərbaycan oftalmologiya məktəbinin zəngin ənənələrini davam etdirən Elmi Tədqiqat Göz Xəstəlikləri İnstitutu səhiyyə sahəsində müstəqil Azərbaycan dövləti qarşısında duran böyük vəzifələrin yerinə yetirilməsi işinə töhfəsini bundan sonra da verəcək, xalqımızın sağlamlığının qorunması naminə əlindən gələni əsirgəməyəcəkdir.
Sizə bu məsuliyyətli, xeyirxah və gərəkli fəaliyyətinizdə yeni-yeni müvəffəqiyyətlər arzulayır, hamınıza cansağlığı və xoşbəxtlik diləyirəm.
İlham Əliyev
Azərbaycan Respublikasının Prezidenti
Bakı şəhəri, 8 iyun 2006-cı il.