Alimlər: Yeməklərin kaloriliyi arıqlamağa təsir göstərmir
Bakı, 22 iyun, AZƏRTAC
Yeməklərdə kaloriliyin yüksək və ya aşağı olması heç də arıqlamağa təsir etmir. Mütəxəssislərin fikrincə, pəhrizi zamanı sadəcə ciddi rejim üzrə qidalanmaq vacibdir.
AZƏRTAC Rusiya KİV-lərinə istinadən xəbər verir ki, alimlər laboratoriyada siçanlar üzərində bir sıra eksperimentlər apardıqdan sonra bu qənaətə gəliblər. Gəmiricilərin bir hissəsinə sutkada 3 dəfə təyin edilmiş vaxtlarda yemək verilib. Digər hissəsinə isə yeməklərin qəbulunda məhdudiyyət qoyulmayıb. Siçanlar nə vaxt istəyib, onda da qidalanıblar.
Nəticələr çox maraqlı olub. Birincilər, yəni rejimlə qidalananlar ikincilərlə müqayisədə daha “zərif” olublar. Nəticələr, hətta heyvanlara yağlı və dadlı yemək verəndə də dəyişməyib.
Tədqiqatçılar hesab edirlər ki, rejim üzrə qidalananda yeməyin daxil olacağını orqanizm “başa düşür”, həzm sistemi əvvəlcədən buna hazır olur və daha səmərəli işləyir. Onların fikrincə, artıq çəki yığmamaq üçün sutkada ən azı 12 saat ac qalmaq faydalıdır. Artıq çəki böyük problemdir. Odur ki, piylənmə ilə mübarizə aparmaq lazımdır.
Bölmənin digər xəbərləri
