“Alınmaz qaya”ya Azərbaycan Bayrağını sancarkən şəhid olan Ramil Babayev
Şəhidin həyat yoldaşı: Onun ən böyük arzusu torpaqlarımızı azad etmək və Qarabağı qarış-qarış gəzmək idi
Bakı, 15 oktyabr, AZƏRTAC
Vətən müharibəsinin ilk günlərində onunla əlaqə saxlaya bilirdik. Ramil bizi sakitləşdirməyə çalışır, onun üçün həyəcan keçirməməyə çağırırdı. Elə həmin telefon danışığı zamanı o, qızı Mədinəni əmanət etdi. Sentyabrın 29-u Ramilə zəng etdik, ancaq əlaqə saxlaya bilmədik. Sonradan öyrəndik ki, həmin gün Ramil öz heyəti ilə birlikdə Murovdağ istiqamətində “Alınmaz qaya” deyilən yerdə ağır döyüşdə imiş. Milli Ordunun əsgərlərinin şücaəti sayəsində həmin zirvə düşməndən azad edilib və Ramil Azərbaycan Bayrağını oraya sancarkən şəhid olub...
Vətən müharibəsinin şəhid zabiti, cəsur döyüşçü Ramil Babayevin bacısı Ramilə xanım bu barədə AZƏRTAC-ın müxbirinə bildirib.
Ramil Taqət oğlu Babayev 1991-ci il dekabrın 12-də Kürdəmir rayonunun Şilyan kəndində anadan olub. Kürdəmir şəhər T. İsmayılov adına 1 nömrəli tam orta məktəbi bitirən Ramil Cəmşid Naxçıvanski adına Hərbi liseydə və Heydər Əliyev adına Azərbaycan Ali Hərbi Məktəbində təhsil alıb. Hərbi xidmətə Goranboy rayonundakı hərbi hissədə başlayıb. Xidməti boyu nizam-intizamı, peşəkarlığı ilə fərqlənib. Dəfələrlə komandirləri tərəfindən müxtəlif təltiflərə layiq görülüb. Öz cəsurluğu və vətənpərvərliyi ilə seçilən gənc zabit 2016-cı ilin Aprel döyüşlərində də iştirak edib. 2020-ci il sentyabrın 27-də kəşfiyyatçı kimi Vətən müharibəsi döyüşlərinə qatılıb. Sentyabrın 29-da Murovdağ istiqamətində gedən döyüşlərdə şəhid olub. Onun nəşini uzun müddət tapmaq mümkün olmayıb. Tapılandan sonra, 2021-ci il yanvarın 31-də Kürdəmir rayon Şəhidlər xiyabanında torpağa tapşırılıb.
Ramil şəhid olanda Mədinə adlı qızı var idi, ölümündən sonra oğlu dünyaya gəldi və atasının adını daşıyır.
Bacısı Ramilə qardaşının Vətən təəssübkeşliyindən söhbət açaraq deyib: “Hələ ibtidai sinifdə təhsil alarkən kitablarda Xocalı faciəsi ilə bağlı məlumatları oxuyar, düşmənə nifrət bəsləyərdi. Kiçik yaşlarından hərbə marağı olan qardaşım həmişə deyirdi ki, Vətən bizim namusumuz, şərəfimiz və mənliyimizdir. Vətənə sevgi və məhəbbət insanın daxilindən gəlir. Xəmirimiz Vətənə məhəbbət hissi ilə yoğrulmalıdır”.
Şəhidin həyat yoldaşı Türkan Babayeva bildirib: “Onun ən böyük arzusu torpaqlarımızı azad etmək və Qarabağı qarış-qarış gəzib-dolaşmaq idi. O, həmişə deyirdi ki, torpaqlar azad olunandan sonra mən hərbçi kimi rahat ola bilərəm. Təəssüf ki, o, bu arzusuna çata bilmədi. Lakin elə bu yolda da şəhid oldu. Təsəllimiz odur ki, onun ruhu azad Qarabağ torpağında dolaşır...”.
Ramilin anası İlhamə Babayeva isə 5 il əvvəli belə xatırlayıb: “Vətən müharibəsindən bir həftə əvvəl Ramillə son görüşüm oldu. O, sağollaşanda mənə xeyli ürək-dirək, toxtaqlıq verdi, heç nəyin fikrini çəkməməyimi tapşırdı. Tezliklə hər şeyin yoluna düşəcəyini dedi. Elə bil, son görüş olduğunu hiss etmişdi”.
Kapitan Ramil Babayev ölümündən sonra 3-cü dərəcəli “Rəşadət” ordeni, “Vətən uğrunda”, “Suqovuşanın azad olunmasına görə” və “İgidliyə görə” medalları ilə təltif edilib.
Oxuduğu məktəbin həyətində Ramilin xatirəsinə şəhid bulağı inşa olunub.
Bölmənin digər xəbərləri
