ALMATIDA ASİYA-SAKİT OKEAN YAYIM ŞURASININ 41-Cİ BAŞ ASSAMBLEYASI KEÇİRİLMİŞDİR

29.09.2004 [19:42]
Çap et
A⁺ A^-

AZƏRTAC-ın xüsusi müxbirinin verdiyi xəbərə görə, Almatıda Asiya-Sakit Okean Yayım Şurasının 41-ci Baş Assambleyası başa çatmışdır. Qazaxıstan Baş nazirinin müavini Bırqanım Aytimova Prezident Nursultan Nazarbayevin təbrikini oxumuşdur. Təbrikdə deyilir ki, belə bir forumun Qazaxıstanda keçirilməsi mühüm hadisədir. Bu gün ölkədə 2 mindən yuxarı kütləvi informasiya vasitəsi, 175 teleradio şirkəti, 11 informasiya agentliyi fəaliyyət göstərir. Qazaxıstanda xarici kütləvi informasiya vasitələrinin 80 nümayəndəsi çalışır.

Asiya-Sakit Okean Yayım Şurasının prezidenti Katsuyi Ebisava və 41-ci Baş Assambleyanın təşkilat komitəsinin sədri Dariqə Nazarbayeva tədbirdə çıxış edərək vurğulamışlar ki, irimiqyaslı hər bir belə tədbir beynəlxalq inteqrasiya üçün böyük əhəmiyyət daşıyır. Çünki KİV-lər ictimai fikri formalaşdırmaqla yanaşı, dövlətlər arasında qarşılıqlı münasibətlərə də güclü təsir göstərir.

Beynəlxalq forumda Asiyanın və qonşu regionların 200-dən çox iri teleradio şirkəti təmsil olunmuşdur.