ALMATIDA AZƏRBAYCAN MƏTBƏXİ FESTİVALI KEÇİRİLMİŞDİR
Tədbiri Qazaxıstan Xalqları Assambleyası sədrinin müavini Sergey Tereşşenko açaraq, “Turan” konqresinin işini yüksək qiymətləndirmişdir. O demişdir ki, “Turan” konqresi Azərbaycanın dövlət və milli bayramlarını yüksək səviyyədə qeyd edir. Konqresin nəzdində Azərbaycan məktəbi fəaliyyət göstərir. Onlar radioda Azərbaycan dilində proqramlar da hazırlayırlar. Bu verilişlərdə ölkənizin ədəbiyyatı, incəsənəti, mədəniyyəti təbliğ olunur. Elə bilirəm ki, bura topeaşa Azərbaycan mətbəxini ürəkdən bəyənəcəklər. Məncə, çoxdan sizin mətbəxin vurğunuyam.
“Turan” konqresinin sədri Əbülfəz Xamedov, Litvanın Qazaxıstandakı səfiri Ranoldas Busakaviçus və başqaları çıxış etmişlər.
Sergey Tereşşenko nümunəvi işinə görə Qazaxıstan Xalqları Assambleyası adından Əbülfəz Xamedova diplom təqdim etmişdir.
Sonra qonaqlar süfrəyə dəvət olunmuşlar. Müxtəlif çeşidli Azərbaycan xörəkləri, milli şirniyyatlar və şərbətlər qonaqların çox xoşuna gəlmişdir.
Salonda Azərbaycan musiqisi də səslənmişdir. “Arzu” xalq çalğı alətləri ansamblının solistləri İmran Əmrahov, Əlixan Ağammədov xalq mahnı və təsniflərimizi, Əlibaba Mirqafarov isə milli saz havalarımızı ifa etmişlər.
