AMERİKA BİRLƏŞMİŞ ŞTATLARI GÜRCÜSTAN HÖKUMƏTİNİN BAKI-TBİLİSİ-CEYHAN BORU KƏMƏRİNİ TƏSDİQLƏMƏSİNİ ALQIŞLAYIR
ABŞ dövlət departamenti mətbuat katibinin ofisindən AZƏRTAC-ın müxbirinin aldığı məlumata görə, mətbuat katibi Riçard Bauçer Birləşmiş Ştatların Gürcüstan hökumətinin Bakı-Tbilisi-Ceyhan boru kəmərinin texniki-ekoloji tələblərə cavab verdiyini təsdiqləməsini alqışladığını bildirən bəyanatla çıxış etmişdir.
Bəyanatda deyilir: Bundan əvvəl Azərbaycan və Türkiyə hökumətləri tərəfindən edilmiş təsdiqləmələrlə yanaşı, bu addım Gürcüstana sərmayə gətirəcək və eyni zamanda, Xəzər hövzəsi ölkələrinin suverenliyi və müstəqilliyini gücləndirəcək layihənin həyata keçirilməsində mühüm mərhələdir.
ABŞ dövlət departamenti kəmərin marşrutu üzərində yerləşən ölkələri və lahiyənin icraçılarını tam dəstəkləyir, layihənin ekoloji cəhətdən tənzimlənməsini ən yüksək standartlara uyğunlaşdırmaq istiqamətində onların göstərdiyi səyləri bəyənir və kəmərin keçəcəyi ərazilərdə yaşayan insanlar üçün yaradılacaq iqtisadi imkanları alqışlayır. Biz 2005-ci ilədək başa çatdırılacaq bu layihədə bütün tərəfdaşlarla sıx əməkdaşlığımızı davam etdirəcəyimizə əminik.
Bölmənin digər xəbərləri
