Böyük Britaniyanın Baş naziri: Hökumət sərt qərarlar qəbul etməyə məcburdur
London, 12 iyun, AZƏRTAC
Böyük Britaniyanın Baş naziri Kir Starmer müdafiə xərclərinin artırılması ilə bağlı qəbul etdiyi çətin qərarları müdafiə edərək, ölkənin təhlükəsizliyinin onun hökumətinin əsas prioriteti olduğunu bildirib.
AZƏRTAC xəbər verir ki, Starmer bu barədə BBC-yə müsahibəsində danışıb.
O, müdafiə naziri Con Hilinin müdafiə investisiya planı ilə bağlı narazılıq səbəbindən istefa verməsindən sonra ilk dəfə ictimaiyyət qarşısında çıxış edib.
Baş nazir deyib ki, dünya hazırda son dərəcə qeyri-sabit və təhlükəli dövrdən keçir, bu şəraitdə hökumət sərt qərarlar qəbul etməyə məcburdur. O vurğulayıb ki, hökumət 2027-ci ilə qədər müdafiə xərclərini ümumi daxili məhsulun 2,6 faizinədək artırmağı planlaşdırır. Bu məqsədlə xarici inkişaf yardımlarının büdcəsində ixtisarlar aparılıb.
Baş nazir, həmçinin bildirib ki, ölkənin təhlükəsizliyini təmin etmək üçün zəruri addımlar atmağa davam edəcək və müdafiə xərcləri hər bir büdcə icmalında əsas prioritet olaraq qalacaq. Liderlik məsələsinə də toxunan Starmer deyib ki, yeni lider seçkisi ölkəni siyasi xaosa sürükləyə bilər. Bununla belə, o, belə bir yarış olarsa, mübarizə aparacağını vurğulayıb.
Xatırladaq ki, müdafiə naziri Con Hili hökumətin yeni müdafiə investisiya planının ölkənin təhlükəsizlik ehtiyaclarını tam qarşılamadığını bildirərək vəzifəsindən istefa verib. Onun ardınca silahlı qüvvələr naziri Al Karns da müdafiə büdcəsi ilə bağlı narazılıq səbəbindən istefa verdiyini açıqlayıb.
Bölmənin digər xəbərləri
