Ana dili - Milyonlarla azərbaycanlı üçün Vətənlə övladları arasındakı ən möhkəm körpü ŞƏRH
Bakı, 31 iyul, AZƏRTAC
Azərbaycan Əlifbası və Azərbaycan Dili Günü Vətənini sevən hər bir azərbaycanlı üçün yalnız təqvimdə qeyd olunan əlamətdar gün deyil, xalqımızın milli kimliyini, tarixi yaddaşını, mənəvi dəyərlərini və dövlətçilik ənənələrini yaşadan ən böyük sərvətidir. Yüz illər boyu durmadan inkişaf edən dilimiz zəngin ədəbi irsi, səlis fonetikası, geniş ifadə imkanları ilə türk dilləri ailəsində mühüm mövqeyə sahib olub. Bu axıcı dil azərbaycanlıların düşüncə tərzini, milli-mədəni irsini, adət-ənənələrini və mənəvi dünyasını yaşadan müqəddəs xəzinədir. Danılmaz həqiqətdir ki, dünyanın müxtəlif ölkələrində yaşayan milyonlarla azərbaycanlı üçün də ana dili Vətənlə övladları arasında mənəvi bağ yaradan ən möhkəm körpüdür.
Bu sözləri AZƏRTAC-a açıqlamasında jurnalist Teymur Mahmudov deyib.
O vurğulayıb ki, Azərbaycan dilinin ən ali kürsülərdə eşidilməsi, nüfuz qazanması üçün yorulmaz fəaliyyət nümayiş etdirən Ulu Öndər Heydər Əliyev Azərbaycan dilinin dövlət dili kimi möhkəmlənməsi və inkişafını müstəqil dövlət quruculuğunun prioritet istiqamətlərindən biri hesab edib. Azərbaycan dilinin inkişafı və qorunması istiqamətində həyata keçirilən dövlət siyasətində 2001-ci ildə imzalanan Fərman xüsusi əhəmiyyət daşıyır. Belə ki, Ulu Öndərin 9 avqust 2001-ci il tarixli Fərmanı ilə latın qrafikalı Azərbaycan əlifbasına keçid prosesi tam başa çatıb və avqustun 1-i Azərbaycan Əlifbası və Azərbaycan Dili Günü kimi təsis olunub. Bu mühüm qərar milli-mənəvi dəyərlərimizin qorunması, Azərbaycan dilinin dövlət dili kimi mövqeyinin daha da möhkəmləndirilməsi və gələcək inkişafı baxımından olduqca əhəmiyyətlidir.
“Ulu Öndər Heydər Əliyevin müəyyən etdiyi dil siyasəti bu gün Prezident İlham Əliyev tərəfindən uğurla davam etdirilir. Dövlətimizin başçısının da dəfələrlə vurğuladığı kimi, ana dilinin qorunmasının yalnız dil məsələsi deyil, milli kimliyin, dövlətçilik ənənələrinin və mənəvi dəyərlərin gələcəyi ilə birbaşa bağlıdır. Məhz onun rəhbərliyi ilə “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın təsdiq edilməsi haqqında Sərəncam, “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” Fərman, həmçinin dövlət dilinin elektron mühitdə, mediada, təhsil sistemində və rəsmi sənəd dövriyyəsində daha geniş tətbiqinə yönələn digər qərarlar Azərbaycan dilinin inkişafına xidmət edən mühüm hüquqi əsaslardır. Sevindirici haldır ki, bu gün Azərbaycan dili yalnız ölkəmizdə deyil, dünyanın müxtəlif qitələrində yaşayan milyonlarla soydaşımız tərəfindən yaşadılır, öyrədilir və təbliğ olunur. Rəqəmsal texnologiyaların, elektron medianın və süni intellektin durmadan inkişaf etdiyi yeni çağırışlar dövründə Azərbaycan dilinin informasiya məkanındakı mövqeyi daha da möhkəmlənir. Dövlət tərəfindən həyata keçirilən məqsədyönlü siyasət nəticəsində isə dilimizin beynəlxalq rəqəmsal mühitdə istifadə imkanları genişlənir, elmi, mədəni və texnoloji resursları ildən-ilə zənginləşir”, - deyə jurnalist bildirib.
Teymur Mahmudov qeyd edib ki, Azərbaycan dili hər bir azərbaycanlının qüruru, vizit kartı, mənəvi sərvəti və gələcək nəsillərə ötürəcəyi ən qiymətli mirasıdır. Bu çoxçalarlı, saf dilin qorunması, daha da inkişaf etdirilməsi, gələcək nəsillərə olduğu kimi çatdırılması hər bir soydaşın milli borcu və mənəvi məsuliyyətidir.
Bölmənin digər xəbərləri
