Andrey Kortunov: Cənubi Qafqazda hər zaman həm problemlər, həm imkanlar mövcuddur
Moskva, 18 noyabr, AZƏRTAC
Rusiya ilə Azərbaycan arasındakı münasibətləri strateji tərəfdaşlıq kimi xarakterizə etmək olar. Bu münasibətlərə yeni dinamika vermək üçün son illər çox işlər görülüb. Biz artıq bu fəaliyyətlərin ilk nəticəsini görürük - onlar həm siyasi səviyyədə, həm də iqtisadi əlaqələrdə özünü göstərir.
AZƏRTAC xəbər verir ki, bu fikirləri Rusiya Beynəlxalq Məsələlər Şurasının Baş direktoru Andrey Kortunov Rusiya-Azərbaycan Ekspert Şurasının ikinci iclası çərçivəsində jurnalistlərə bildirib.
Baş direktor qeyd edib ki, istənilən ekspert görüşü, xüsusən də ekspertlər dövlət strukturları ilə əlaqəli olduqda rəsmi səviyyədə əlaqələrə kömək etməlidir. “Ekspertlərin bəzən öz fikirləri olur, tarixi perspektivi nəzərə alsaq, onlar rəsmi şəxslərdən fərqli olaraq daha çox imkana malikdir, problemlərə daha geniş baxa bilirlər. Ekspertlər beş və ya daha çox ildən sonra münasibətlərimizin nə ilə nəticələnəcəyi barədə düşünə bilərlər. Əlbəttə ki, səmimi, maraqlı söhbət getdiyinə görə biz həmkarlarımıza minnətdarıq”, - deyə A.Kortunov qeyd edib.
Ekspertin fikrincə, Rusiya-Azərbaycan Ekspert Şurasının iclası müstəqil ekspertlər arasında dialoqun yüksələn xətt üzrə getdiyindən xəbər verir. “Eyni zamanda, əlbəttə, biz bilməliyik ki, heç bir iki dövlətin tamamilə eyni maraqları ola bilməz. Burada biz təkcə maraqların üst-üstə düşdüyü sahələrdə əməkdaşlığı necə inkişaf etdirmək barədə deyil, həm də problemlər yaranan yerlərdə münasibətlərimizi necə idarə etmək barədə düşünməliyik. Vurğulamaq istərdim ki, mənim fikrimcə ekspertlər səviyyəsində həll olunmamış, həmçinin siyasi baxımdan həssas olan məsələləri müzakirə etmək daha məqsədəuyğundur. Ümid edirəm ki, bu gün də düşünməyi tələb edən mürəkkəb məsələlər bizim ekspert söhbətimizin predmetinə çevriləcək”, - deyə A.Kortunov bildirib.
Cənubi Qafqazdakı vəziyyətdən danışaraq o qeyd edib ki, bu, daim problemlərin və imkanların mövcud olduğu regionlardan biridir. “Bu, tarixi, siyasi, tarixi-etnik, konfessional baxımdan dünyanın ən mürəkkəb regionlardan biridir. Hazırda formalaşmaqda olan dünyanın Avrasiya mozaikasında Cənubi Qafqaz mərkəzi hissələrdən biridir. Əgər bu regionda sabitlik və dayanıqlı inkişaf əldə olunmazsa, o zaman bir çox çoxtərəfli Avrasiya layihələri həyata keçirilməyəcək. Həm Rusiya Federasiyası, həm də bir çox digər Avrasiya dövlətləri üçün regionun problemlərinin həlli prinsipial məsələdir”, - deyə A.Kortunov vurğulayıb.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
