Apteklərdə dərmanların vahid qiymətə satılması ilə əlaqədar təkliflər hazırlanmışdır
Bakı, 13 sentyabr (AZƏRTAC). Apteklərdə qanunsuz dərman satışına bu gün də rast gəlinir. Bu məsələ daim Səhiyyə Nazirliyinin nəzarəti altındadır. Apteklərdə yoxlamalar mövcud qanunvericilik çərçivəsində aparılır.
AZƏRTAC xəbər verir ki, bu barədə Cərrah və Qastroenteroloqların Beynəlxalq Avrasiya Elmi Cəmiyyətinin Bakıda keçirilən XIII beynəlxalq konqresində iştirak edən səhiyyə nazirinin müavini Elsevər Ağayev jurnalistlərə açıqlamasında məlumat vermişdir.
Onun sözlərinə görə, Səhiyyə Nazirliyi dərmanların vahid qiymətə satılması ilə əlaqədar İqtisadi İnkişaf Nazirliyi ilə birgə təkliflər hazırlayaraq Nazirlər Kabinetinə təqdim etmişdir. Təkliflərdə dərmanların hər yerdə vahid qiymətə satılması nəzərdə tutulur. Hər bir dərmanın üzərində isə qiyməti göstəriləcəkdir.
Nazir müavini yoluxucu xəstəliklərə qarşı mübarizə aparılmasının Azərbaycan səhiyyəsinin prioritet istiqamətlərindən biri olduğunu bildirmişdir. Qeyd etmişdir ki, dünya təcrübəsinə uyğun olaraq ölkəmizdə 10 yoluxucu xəstəliyə qarşı vaksinasiya aparılır.
Bölmənin digər xəbərləri
