AŞIQ SƏNƏTİ MÜSABİQƏSİNİN QALİBLƏRİ MÜƏYYƏNLƏŞDİRİLDİ
Nazirliyin mətbuat xidmətindən AZƏRTAC-a bildirmişlər ki, müsabiqədən məqsəd Azərbaycan xalq yaradıcılığında xüsusi yeri olan aşıq sənətinə marağı artırmaq, qədim və müasir el havalarını qorumaq, istedadlı gəncləri üzə çıxarmaqdır. Respublikanın müxtəlif bölgələrini təmsil edən 80 nəfərə yaxın ifaçının iştirak etdiyi müsabiqənin ikinci turu sentyabrın 23-25-də Şəmkir rayonunda keçirilmişdir.
Yekun mərhələdə gənc ifaçıların istedad və bacarıqlarını əməkdar mədəniyyət işçisi İsfəndiyar Rüstəmov, Milli Elmlər Akademiyası Folklor Sarayının aşıq yaradıcılığı şöbəsinin müdiri Elxan Məmmədli və digərləri qiymətləndirmişlər.
Münsiflər heyətinin qərarı ilə Şöhrət Kərimov (Kəlbəcər), Elbrus Hüseynov, Taleh Abdullayev (Şəmkir), Roman Zeynalov (Tovuz), Sahil Qurbanov (Abşeron), Xəyal Abdullayev (Kəlbəcər) və başqaları müsabiqənin qalibi adına layiq görülmüşlər.
Yaxın günlərdə qaliblərin Heydər Əliyev adına sarayda keçiriləcək konsertində onlara Aşıq Şəmşir adına fondun diplomları və hədiyyələri təqdim olunacaqdır.
Bölmənin digər xəbərləri
