A.ŞVARTSENEGGER KALİFORNİYA HƏBSXANALARINDA SİQARET ÇƏKMƏYİ QADAĞAN ETMİŞDİR

28.09.2004 [20:05]
Çap et
A⁺ A^-

AZƏRTAC Assoşieyted Press agentliyinə istinadla xəbər verir ki, Kaliforniya qubernatoru Arnold Şvartsenegger öz ştatının həbsxanalarında siqaret çəkməyi qadağan etmişdir. O, bununla əlaqədar tütünün həbsxanlarda qanunsuz yayılacağından narahat olsa da, ştatın büdcəsi üçün 280 milyon dollar qənaət etməyi qərara almışdır. Kaliforniya həbsxanalarında hər il məhz bu məbləğdə siqaret çəkilir.

160 min məhbusun yarısı siqaretçəkəndir. Qanunvericilər onların sağlamlığını, eləcə də mənəvi dayaqlarını məcburi surətdə möhkəmlətmək qərarına gəlmişlər. Beləliklə, Şvartsenegger təkcə büdcəni deyil, həm də məhbusların həyatını xilas edəcəkdir.

Maraqlıdır ki, qubernatorun özü yaxşı siqar çəkmək həvəskarıdır. Doğrudur, o, ətrafdakıların sağlamlığına çox həssaslıqla yanaşır. Ona görə də siqaretçəkənlər üçün ofisinin yaxınlığında xüsusi yer ayırmışdır.

Xatırladaq ki, Birləşmiş Ştatların yeddi ştatının həbsxanalarında siqaret çəkmək qadağan edilmiş, beş ştatda isə müxtəlif məhdudiyyətlər qoyulmuşdur.