SİYASƏT
ATƏŞKƏS REJİMİNİ POZAN ERMƏNİLƏR XEYLİ İTKİ VERƏRƏK GERİ ÇƏKİLMİŞLƏR
İyulun 5-də saat 19.50-də Ermənistan silahlı qüvvələrinin bölmələri Füzuli rayonunun Qaraxanbəyli kəndinin işğal olunmuş 4 kilometr şimal-qərbindəki mövqelərindən Azərbaycan Silahlı Qüvvələrinin həmin kəndin ərazisində yerləşən üzbəüz postunu ələ keçirmək üçün qəflətən atəş açaraq hücuma keçmişlər. Müdafiə Nazirliyinin mətbuat xidmətindən AZƏRTAC-a daxil olmuş məlumatda deyilir ki, Azərbaycan Silahlı Qüvvələri bölmələrinin güclü müqaviməti ilə qarşılaşan düşmənlə bir saat yarım davam edən döyüş zamanı Ermənistan silahlı qüvvələrinin 5 nəfər əsgər və zabiti öldürülmüş və çoxlu sayda əsgər və zabiti yaralanmışdır. Azərbaycan Silahlı Qüvvələri tərəfindən hərbi qulluqçular Rövşən Salman oğlu Yusifov (28 noyabr 1976-cı ildə anadan olub, 26 iyul 1994-cü ildə Bakı şəhəri Nizami Rayon Hərbi Komissarlığından çağrılıb) baş nahiyyəsindən aldığı güllə yarasından həlak olmuş və Vidadi Qurbanəli oğlu Salayev (1967-ci ildə anadan olub, 7 fevral 1994-cü ildə Lənkəran Rayon Hərbi Komissarlığından çağrılıb) aldığı güllə yarasından hərbi xəstəxanada vəfat etmişdir. Azərbaycan Silahlı Qüvvələrinin 4 nəfər əsgəri yaralanmışdır. Müdafiə Nazirliyinin rəhbərliyi Vətən qarşısında xidməti vəzifəsini şərəflə yerinə yetirərkən həlak olmuş Rövşən Yusifovun və Vidadi Salayevin ailəsinə dərin hüznlə başsağlığı verir və onlara Allahdan rəhmət diləyir.