Avropa çempionu olan cüdoçu: Növbəti hədəf Olimpiya medalıdır - MÜSAHİBƏ
Bakı, 7 noyabr, AZƏRTAC
Fransanın Monpelye şəhərində keçirilmiş Avropa çempionatında qızıl medal qazanan Azərbaycan cüdoçusu Zelim Kotsoyev (100 kiloqram) AZƏRTAC-ın suallarını cavablandırıb. Həmin müsahibəni təqdim edirik.
- Karyeranızda ilk dəfə Avropa çempionu oldunuz. Yəqin ki, bu anı çoxdan gözləyirdiniz. Təəssüratlarınızı bilmək maraqlı olardı…
- Bəli, ilk Avropa çempionluğuna görə çox sevindim. Daha əvvəl üç bürünc medal qazanmışdım. Həmçinin iki dəfə dünya üçüncüsü olmuşam. Amma qızıl medal əldə etmək tamam fərqli hissdir. Şadam ki, uzun müddət gözlənilən qızıl medal gəldi.
- Finalda öz çəkisində dünya reytinqinin lideri, Olimpiya mükafatçısı olan gürcüstanlı İlia Sulamanidzeyə qalib gəldiniz. Titullu rəqibinizlə həlledici görüş barədə nə deyə bilərsiniz?
- İlia gənc və güclü idmançıdır. Bunadək ona iki dəfə uduzmuş, bir dəfə isə qalib gəlmişdim. Gürcüstanlı cüdoçunu sonuncu dəfə dünya çempionatında bürünc medal uğrunda qarşılaşmada üstələmişəm. Bu mənada final qarşılaşması çox prinsipial keçdi. Yalnız qələbəyə köklənmişdim. Prinsipcə, finaladək qarşılaşdığım rəqiblər də çox güclü idilər. Hətta 1/4 finalda İspaniyanı təmsil edən ikiqat dünya çempionu Nikoloz Şerazadişviliyə qalib gəldim. Ardınca yarımfinalda rusiyalı Matvey Konikovski ilə üz-üzə gəldim. Sentyabrda Bakıda keçirilmiş “Böyük dəbilqə” turnirində ona uduzmuşdum. Finaldakı rəqibimi də tanıyırsınız. Ona görə də Avropa çempionatındakı görüşlərimin çoxu çətin keçdi. Buna baxmayaraq, yekunda qızıl medal qazandım. Məhz buna görə məşqçilərimə, bizə yüksək səviyyədə dəstək verən federasiya rəhbərliyinə təşəkkürümü bildirirəm.
- Final qarşılaşmasından öncə hansı hissləri keçirirdiniz? Hər hansı narahatlıq, həyəcan var idi?
- Yarımfinal və final görüşlərindən öncə döyüşkən əhvali-ruhiyyədə idim. Çünki yenidən bürünc medal uğrunda güləşmək istəmirdim. Ona görə də yalnız qızıl medal haqqında düşünürdüm. Yarışa da məhz Avropa çempionu olmaq üçün yollanmışdım. Narahatlıq, həyəcan olmalıdır. Bütün idmançılar vacib görüşlərdən öncə bu cür hissləri keçirirlər. Əsas odur ki, onu cilovlaya biləsən. Çünki həyəcan mübarizə aparmağa mane olur. Hisslərimi idarəyə etməyə, həyəcanı və gərginliyi üzərimdən atmağa çalışırdım.
- Cüdo millisi Avropa çempionatını iki qızıl medalla başa vurdu. Sizdən öncə Hidayət Heydərov (73 kiloqram) fəxri kürsünün ən yüksək pilləsinə qalxdı. Yığmanın ümumi çıxışını necə dəyərləndirirsiniz?
- Düşünürəm ki, iki qızıl medal çox yaxşı nəticədir. Məsələn, Rusiya və Gürcüstan kimi güclü yığmalar yarışı qızıl medalsız başa vurdular. Bizdə isə iki ən yüksək əyarlı medal oldu. Bu, bizim komanda şəklində işimizin nəticəsidir.
- Hazırda dünya reytinqində ikinci sıradasınız. Avropa çempionluğu mövqeyinizə təsir edəcək?
- Xeyr, elə ikinci sırada da qalacağam. Çünki bu ilin avqustunda Masters turnirini buraxdım. Həmin yarış yaxşı reytinq xalları verirdi. Orada çıxış etməyi çox istəyirdim. Təəssüf ki, zədəyə görə alınmadı. Masters turnirinə qatılıb orada uğurlu çıxış etsəydim, bu gün reytinqdə birinci sırada ola bilərdim. Amma qarşıda Tokio “Böyük dəbilqə” turniri var. Həmin yarışda da iştirakım gözlənilir. Tam dəqiq bilmirəm, məşqçilərlə məsləhətləşəcəyəm.
- Avropa çempionu oldunuz. Yəqin ki, bundan sonra əsas hədəf Olimpiya medalı olacaq. Özünüzə inanırsınız?
- Əlbəttə, əsas hədəf odur. Avropa və dünya çempionatları Olimpiadaya gedən yolun başlanğıcıdır. Ən önəmli gün qarşıdadır. Hər şey 8 aydan sonra Parisdə keçiriləcək Yay Olimpiya Oyunları üçündür. Azərbaycan cüdo ailəsi üçün oradan qızıl medalla qayıdacağıma inanıram. Bunun üçün ətrafımda doğru insanlar var. Onlar mənə düzgün yolu göstərir, kömək edirlər. Dünya çempionumuz Elxan Məmmədov hər zaman yanımdadır. Bütün məşqçilər mənə dəstək olurlar. Hamımız bu amal və arzu ilə yaşayırıq.
Bölmənin digər xəbərləri
