AVROPA GƏNCLƏRİ BAKIDA TANIŞ OLURLAR
AZƏRTAC xəbər verir ki, avqustun 1-dən Bakıda İspaniya, İtaliya, Rumıniya, Estoniya, Ukrayna, Fransa, Çexiya, Belarus, Gürcüstan və Türkiyə gənclərinin iştirakı ilə “Gənclər fəaliyyətdə=Gənclərin dialoqu+Gənclərin əməkdaşlığı” adlı beynəlxalq tanışlıq səfəri başlamışdır.
Səfər “İrəli” Ümumrespublika Gənclər Hərəkatı, Azərbaycan Könüllülər İctimai Birliyi, Türkiyə Milli Gənclər Agentliyi, Azərbaycan Respublikası Gənclər və İdman Nazirliyi tərəfindən təşkil edilmişdir.
Bu münasibətlə avqustun 2-də açılış mərasimi keçirilmişdir.
Tədbirdə layihənin əlaqələndiricisi Səbuhi Rzayev, Gənclər və İdman Nazirliyinin təmsilçisi Fuad Babayev çıxış edərək bildirmişlər ki, tanışlıq səfərinin məqsədi Avropa Birliyinə qonşu olan ölkələrdəki gənclər və gənclər təşkilatlarının əməkdaşlığını genişləndirməkdir. Eyni zamanda, bu layihə Azərbaycandakı gənclər təşkilatlarını tanıdacaq mədəniyyətlərarası dialoqun qurulmasına təkan verəcəkdir.
Səfər zamanı təcrübəli təlimçilərin iştirakı ilə Avropa Birliyi Gənclər Proqramı çərçivəsində təcrübə mübadiləsi aparılacaq, təlim kursları təşkil olunacaq, Avropa könüllülük xidməti çərçivəsində layihələrin hazırlanması kimi məsələlər müzakirə ediləcəkdir.
Tanışlıq səfəri avqustun 7-dək davam edəcəkdir.
Bölmənin digər xəbərləri
