“AVROVİZİYA-2009” MÜSABİQƏSİ SANKT-PETERBURQDA KEÇİRİLƏCƏKDİR
AZƏRTAC Rusiya informasiya agentliklərinə istinadla xəbər verir ki, Sankt-Peterburqun rəhbərliyi “Avroviziya-2009” musiqi müsabiqəsinin Şimal paytaxtında keçirilməsi barədə son qərar qəbul etmişdir. Şəhərin qubernatoru Valentina Matviyenko vurğulamışdır ki, belə irimiqyaslı tədbir şəhərin mədəni həyatının inkişafına yeni təkan verəcəkdir.
Qeyd edək ki, qərarın qəbulunun uzanması beynəlxalq müsabiqəyə heç də birmənalı olmayan münasibətlə bağlıdır. Sankt-Peterburqun qanunverici məclisinin deputatları müsabiqənin bu şəhərdə keçirilməsi imkanlarına baxılması xahişi ilə iki həftə əvvəl Rusiya hökumətinə müraciət qəbul etmişlər. Lakin qərarın qəbul edilməsi ərəfəsində deputat Yevqeni Marçenkonun təşəbbüsü ilə sorğu daxil olmuşdur. Deputat Avropa İttifaqının hər yerindən sərxoşların və narkomanların “Avroviziya-2009” müsabiqəsini izləmək üçün Sankt-Peterburqa toplaşacağından narahatlığını bildirmişdir.
Azərbaycan Avropa miqyaslı bu müsabiqədə iştirakını davam etdirəcəkdir. Lakin seçim turunun iştirakçılarının adları hələlik məlum deyildir.
Bölmənin digər xəbərləri
