Ankarada “Bir şəhər, iki baxış” müsabiqəsinin qalibləri mükafatlandırılıb və sərgi açılıb
Ankara, 12 iyun, AZƏRTAC
İyunun 12-də Ankara Musiqi və Sənət Universitetinin Sərgi Qalereyasında “Bir şəhər, iki baxış: təzadlar və ahəng” adlı beynəlxalq tələbə fotomüsabiqəsi çərçivəsində təşkil olunan sərgisinin açılışı və qaliblərin mükafatlandırılması mərasimi keçirilib.
AZƏRTAC xəbər verir ki, Azərbaycanın Türkiyədəki səfirliyinin nəzdindəki Azərbaycan Mədəniyyət Mərkəzi, Qazi Universiteti və Azərbaycan Memarlıq və İnşaat Universitetinin (AzMİU) birgə layihəsi ilə təşkil olunan tədbirdə mədəniyyət, sənət xadimləri, ictimaiyyət nümayəndələri, mütəxəssislər, müəllim və tələbələr iştirak ediblər.
Tədbiri giriş sözü ilə açan Qazi Universitetinin Memarlıq Fakültəsinin dekanı, professor Ülkü Duman fotomüsabiqəni “Türkiyə ilə Azərbaycan arasındakı qardaşlıq bağlarını sənət, memarlıq və gənclərin kreativ baxışı ilə kəsişdirən əhəmiyyətli təşəbbüs” adlandırıb.
Qazi Universitetinin yaranmasının 100-cü ilində təşkil olunan bu müsabiqənin BMT-nin Ümumdünya Şəhərsalma Forumunun On Üçüncü Sessiyasının (WUF13) ideyası ilə tam üst-üstə düşdüyünü vurğulayan professor müasir Azərbaycanın urbanizasiya siyasətində dayanıqlı inkişafın, tarixi irsin qorunmasının və qlobal çağırışlara cavab verən innovativ şəhərsalma yanaşmalarının prioritet istiqamətlər kimi formalaşdırıldığını vurğulayıb.
Münsiflər heyətinə 32 tələbənin çəkdiyi 85 fotonun təqdim olunduğunu qeyd edən dekan təşəbbüsə dəstək verən qurumlara təşəkkür edib.
Türkiyədəki Azərbaycan Mədəniyyət Mərkəzinin direktoru Samir Abbasov Prezident İlham Əliyevin Azərbaycan Respublikasında 2026-cı ilin “Şəhərsalma və Memarlıq İli” elan edilməsi haqqında Sərəncamına uyğun olaraq həyata keçirilən “Bir şəhər, iki baxış: təzadlar və ahəng” adlı beynəlxalq tələbə fotomüsabiqəsinin çoxəsrlik tarixə malik Azərbaycanın şəhərsalma və memarlıq ənənələrinin yaşadılması, ölkəmizdə bu sahədə yeni çağırışlara cavab verən mütərəqqi yanaşmaların təşviqi və tətbiqinin genişləndirilməsi məqsədi daşıdığını bildirib.
O qeyd edib ki, beynəlxalq aləm Azərbaycanın qazandığı uğurları qəbul edərək WUF13 kimi qlobal tədbirlərin təşkilini ölkəmizə həvalə edir, Bakını isə dünya gündəliyində duran aktual məsələlərin müzakirə olunduğu mühüm mərkəzlərdən biri kimi görür.
S.Abbasov minilliklər boyu müxtəlif mədəniyyətlərin qovuşduğu Azərbaycanda formalaşan memarlıq irsi xalqımızın zəngin tarixini, mədəni müxtəlifliyini və estetik dünyagörüşünü əks etdirən əvəzsiz xəzinə olduğunu vurğulayaraq, qədim yaşayış məskənlərindən orta əsr qalalarına, karvansaralardan saray və məscidlərə, müasir memarlıq nümunələrinə qədər uzanan bu irsin milli kimliyimizin canlı ifadəsi olduğunu qeyd edib.
Tədbirə Bakıdan onlayn formatda qoşulan AzMİU-nun Memarlıq fakültəsinin dekanı, professor Zahidə Məmmədova ilə Qazi Universitetinin Memarlıq Fakültəsinin müəllimi, professor Çiğdem Varol Özden çıxışlarında müasir şəhərsalma yanaşması ilə tarixi ənənələrin vəhdətini çəkdikləri fotolarda əks etdirən gənclərin estetika və mədəniyyət körpüləri qurduqlarını qeyd ediblər, ali təhsil ocaqları arasında əməkdaşlığın əhəmiyyətini vurğulayıblar.
Daha sonra fotosərginin açılışını əks etdirən rəmzi lent kəsilib, fotomüsabiqənin qalibləri mükafatlandırılıb.
Müsabiqənin birinci yerə Aytac Hüseynli “Zamanın iki üzü”, Leyla Hüseynzadə “Tarixi hissə və modernizm”, ikinci yerə Əminə Hüseynova “Yaddaşımızın üç təməl daşı”, Rümeysa Öksüz “Heydər Əliyev Mərkəzi”, üçüncü yerə isə Pərvin Məmmədova “Yan-yana” və Nərmin Qəhrəmanova “Zamanın qatları” adlı əsərləri layiq görülüblər.
Qeyd edək ki, layihə çərçivəsində Qazi Universiteti Memarlıq fakültəsinin müəllim və tələbə heyəti Bakıya səfər edərək Azərbaycan Memarlıq və İnşaat Universitetinin eyni ixtisaslı tələbələri ilə birgə şəhərin tarixi-mədəni mühiti ilə tanış olub, yaradıcılıq məqsədilə fotolar çəkilib və sözügedən fotolar müsabiqəyə təqdim olunub.
Bölmənin digər xəbərləri
