Avstriya İtaliya ilə əməkdaşlıq çərçivəsində 12 döyüş təyyarəsi alacaq
Bakı, 28 dekabr, AZƏRTAC
Avstriya İtaliya ilə əməkdaşlıq çərçivəsində 12 “Leonardo M-346FA” döyüş təyyarəsi alacaq.
AZƏRTAC xəbər verir ki, bu barədə Avstriyanın Müdafiə Nazirliyinin yaydığı press-relizdə deyilir.
“Avstriya İtaliya ilə hökumətlərarası müqavilə çərçivəsində 12 ədəd “Leonardo M-346FA” reaktiv təyyarəsi almağı planlaşdırır”, - deyə məlumatda qeyd olunur. Həmin təyyarələr 2020-ci ildə istismardan çıxarılan “Saab 105” təlim təyyarələrini əvəzləyəcək. Satınalma üçün büdcə hələ 2022-ci ildə təsdiqlənib.
Avstriyanın müdafiə naziri Klaudiya Tannerin sözlərinə görə, İtaliyadan alınacaq reaktiv təyyarələr ölkənin Hərbi Hava Qüvvələrinin imkanlarında yaranan boşluğu dolduracaq, pilotların hazırlıq səviyyəsini 100 faiz artıracaq və hava hücumundan müdafiə sistemlərini əhəmiyyətli dərəcədə gücləndirəcək.
“Leonardo M-346FA” silah daşıya bilən ikiyerlik reaktiv təyyarədir. Avstriya onlardan pilot hazırlığı, quru qoşunlarına dəstək və hava hücumundan müdafiə vasitələri kimi istifadə edəcək.
Bölmənin digər xəbərləri
