AZCON Mühəndislik və Texnologiya Məktəbi beynəlxalq standartlara uyğun yeni təhsil modeli təqdim edəcək
Bakı, 14 may, AZƏRTAC
Müasir universitet yalnız təhsil qurumu deyil. Müasir universitet innovasiya mərkəzi, sənaye tərəfdaşı, texnologiya generatorudur və insan kapitalı formalaşdıran strateji platformadır. AZCON Mühəndislik və Texnologiya Məktəbi məhz bu yanaşmanın real nümunəsidir.
AZƏRTAC xəbər verir ki, bu fikirləri Azərbaycan Texniki Universitetinin (AzTU) rektoru Vilayət Vəliyev AZCON Mühəndislik və Texnologiya Məktəbinin təqdimatına həsr olunan mətbuat konfransında deyib.
Rektor bildirib ki, bu məktəb, kompüter elmləri və kompüter mühəndisliyi ixtisasları üzrə sənayeyönümlü və beynəlxalq standartlara uyğun yeni təhsil modeli təqdim edəcək: “Layihənin ən önəmli tərəflərindən biri onun beynəlxalq keyfiyyət standartlarına əsaslanmasıdır.
Münxen Texniki Universiteti dünyanın ən güclü texniki universitetlərindən biridir. TUM International isə bu universiteti təmsil edən beynəlxalq akademik və innovasiya platformasıdır. Bu əməkdaşlıq kurikulum dizaynını, müəllim seçimini, keyfiyyət təminatını, potensialın artırılması fəaliyyətlərini və sənayeyönümlü tədrisi əhatə edir. Üçillik nəticələrə əsasən tələbələr AzTU-nun diplomu ilə yanaşı TUM International sertifikatını əldə edəcəklər. Bu, beynəlxalq aləmdə yeni tətbiqinə başlanan və region üçün çox mühüm təhsil modelidir”.
Bölmənin digər xəbərləri
