AZƏRBAYCAN AVARÇƏKƏNİ AVROPA ÇEMPİONATINDA FİNALA ÇIXMIŞDIR
Bakı, 27 iyun (AZƏRTAC). Azərbaycan Milli Avarçəkmə Federasiyasından bildirmişlər ki, Almaniyanın Brandenburq şəhərində keçirilən Avropa çempionatında Azərbaycanın daha bir kanoeçisi seçmə mərhələdən birbaşa finala vəsiqə qazanmışdır.
Birnəfərlik qayıqda çıxış edən Valentin Demyanenko 500 metrlik məsafəyə yürüşdə Almaniya, Belarus, Yunanıstan, Portuqaliya, İspaniya və Estoniyadan olan rəqiblərini geridə qoymuşdur. Bu məsafəni 1 dəqiqə 50 saniyə 546 mikrosaniyəyə qət edən Demyanenko seçmə mərhələdə birinci yeri tutmuşdur.
Eyni zamanda, 2 nəfərlik kanoe qayıqlarında çıxış edən avarçəkənlərimiz Maksim Prokopenko-Sergey Bezuqlı cütlüyü də seçmə mərhələdə birinci yeri tutaraq, birbaşa finala çıxmışlar. Onlar iyunun 27-də medallar uğrunda mübarizəyə qoşulacaqlar.
Bölmənin digər xəbərləri
