AZƏRBAYCAN AVARÇƏKƏNLƏRİ AVROPA ÇEMPİONATININ FİNALINA YÜKSƏLMİŞLƏR
Bakı, 25 iyun (AZƏRTAC). İyunun 25-də Almaniyanın Brandenburq şəhərində kayak və kanoe qayıqlarında avarçəkmə üzrə kişi və qadınlar arasında Avropa çempionatı start götürmüşdür. Yarışa 35 ölkədən 17 Olimpiya çempionu olmaqla, 500-dən çox idmançı qatılmışdır.
Azərbaycan Milli Avarçəkmə Federasiyasından bildirmişlər ki, yarışda ölkəmizin idman şərəfini 3 kanoeçi və 1 kayakçı qoruyur.
İki nəfərlik kayak qayıqlarında çıxış edən Maksim Prokopenko - Sergey Bezuqlıy dueti 1000 metrlik məsafəyə yürüşdə seçmə mərhələni hamıdan öndə tamamlamışlar.
Bu məsafəni 3 dəqiqə 36 saniyə 606 mikrosaniyəyə qət edən kanoeçilərimiz birbaşa finala vəsiqə qazanmışlar. Onlar Rusiya, Macarıstan, Almaniya, Belarus, Çexiya və İtaliya təmsilçilərini geridə qoymuşlar.
Final yürüşü iyunun 27-də keçiriləcək.
Bölmənin digər xəbərləri
