Azərbaycan Avrasiya məkanında strateji mövqeyini daha da möhkəmləndirir ŞƏRH
Bakı, 29 iyul, AZƏRTAC
Son illərdə dünyada baş verən geosiyasi dəyişikliklər, qlobal təchizat zəncirində yaşanan yenidənqurma prosesləri və təhlükəsiz ticarət marşrutlarına olan tələbat Orta Dəhlizin əhəmiyyətini misli görünməmiş dərəcədə artırıb. Şərqlə Qərbi birləşdirən ən qısa, təhlükəsiz və səmərəli marşrut kimi öndə gedən bu dəhliz yalnız bir nəqliyyat xətti deyil, eyni zamanda, region ölkələri arasında iqtisadi inteqrasiyanı və sabitliyi möhkəmləndirən strateji bir körpüdür.
Bu sözləri AZƏRTAC-a açıqlamasında Beynəlxalq Avrasiya Mətbuat Fondunun (BAMF) prezidenti Umud Mirzəyev söyləyib.
O bildirib ki, Azərbaycan bu gün Orta Dəhlizin, sadəcə, iştirakçısı deyil, onun əsas təşəbbüskarı və mərkəzi qovşağı rolunu oynayır. Ölkəmizin coğrafi mövqeyi, uzun illər ərzində formalaşdırılan müasir infrastruktur və həyata keçirilən məqsədyönlü logistika siyasəti bu marşrutun dayanıqlılığını təmin edir. Xüsusilə Bakı Beynəlxalq Dəniz Limanının illik aşırılma gücünün 15 milyon tondan 25 milyon tona, konteyner aşırılması imkanının isə 500 min TEU-ya çatdırılması istiqamətində görülən işlər layihənin miqyasını göstərir. Bununla yanaşı, Bakı-Tbilisi-Qars dəmir yolu xəttinin modernləşdirilməsi nəticəsində illik ötürücülük qabiliyyətinin 1 milyon tondan 5 milyon tona qaldırılması, Ələt Azad İqtisadi Zonasının fəaliyyətə başlaması Azərbaycanın bu nəqliyyat şəbəkəsindəki əvəzsiz dayaq nöqtəsi olduğunu bir daha sübut edir.
BAMF prezidentinin sözlərinə görə, son dövrlərdə dünyada və Hörmüz boğazında baş verənlərə baxmayaraq, ölkə rəhbərliyinin liderliyi ilə atılan yeni və qətiyyətli addımlar Orta Dəhlizin səmərəliliyini keyfiyyətcə yeni mərhələyə qaldırır. Azərbaycanın Qazaxıstan, Gürcüstan və Türkiyə kimi tərəfdaş ölkələrlə vahid tarif siyasətinin tətbiqi, gömrük və sərhəd-keçid prosedurlarının rəqəmsallaşdırılması, eləcə də birgə logistika operatorlarının yaradılması yükdaşımaların vaxtına və xərclərinə əhəmiyyətli dərəcədə qənaət etməyə imkan verir. Çindən Avropaya yüklərin çatdırılma müddətinin 12-15 günə qədər endirilməsi Orta Dəhlizin digər alternativ marşrutlar qarşısında böyük üstünlüyüdür. Eyni zamanda, işğaldan azad edilmiş ərazilərimizdə sürətlə bərpa olunan nəqliyyat infrastrukturu və Zəngəzur dəhlizinin açılması perspektivləri marşrutun ötürücülük gücünə yeni nəfəs verəcək, onun rəqabətqabiliyyətliliyini qat-qat artıracaq.
U.Mirzəyev Orta Dəhliz layihəsini regional sülhün, təhlükəsizliyin və tərəqqinin ən vacib təminatçılarından biri kimi qiymətləndirib: “Azərbaycanın irəli sürdüyü güclü siyasi iradə, konkret faktlara söykənən nəhəng infrastruktur layihələri və beynəlxalq əməkdaşlıq modeli göstərir ki, ölkəmiz Avrasiya məkanında dayanıqlı inkişafın, ticarətin və təhlükəsizliyin əsas təminatçılarından biri kimi öz strateji mövqeyini günbəgün daha da möhkəmləndirir”.
Bölmənin digər xəbərləri
