AZƏRBAYCAN DÖVLƏT FİLARMONİYASINDA TƏMİR İŞLƏRİ APARILIR
M.Maqomayev adına Azərbaycan Dövlət Filarmoniyasında fəal surətdə təmir-bərpa işləri aparılır. Nazirlər Kabineti bu məqsədlə 20 milyard manat ayırmışdır. Bu barədə AzərTac-ın müxbirinə Mədəniyyət Nazirliyindən xəbər vermişlər.
Binanın altından yeraltı sular axdığı və nəticədə o, çökməyə başladığı üçün onun yenidən qurulması və bərpa edilməsi zəruriliyi meydana çıxmışdır.
Mədəniyyət Nazirliyi tərəfindən keçirilmiş tenderin nəticələrinə əsasən, dövlət tərəfindən mühafizə olunan bu memarlıq abidəsini təmir və bərpa etmək hüququ “Azərenerjitikintiquraşdırma” Səhmdar Cəmiyyətinə verilmişdir.
Təmir işlərinin gedişində binanın ilkin görünüşünü saxlamaq şərti ilə, onun təməlini, örtüyünü və drenaj sistemini möhkəmlətmək, seysmik davamlılığını artırmaq nəzərdə tutulmuşdur. Bundan əlavə, filarmoniyada simfonik orkestrin, kamera orkestrinin, xor kapellasının, Dövlət Mahnı və Rəqs Ansamblının və digər yaradıcı kollektivlərin fəaliyyəti üçün hər cür şərait yaradılacaqdır.
Təmir-bərpa işləri başa çatdıqdan sonra səsyazma studiyasının mühəndis avadanlığının, habelə kondinsionerləşdirmə, ventilyasiya sistemlərinin alınıb quraşdırılması və filarmoniyanın texniki təchizatı üçün daha 4 tender keçirmək nəzərdə tutulmuşdur.
Bölmənin digər xəbərləri
