Azərbaycan Dövlət Pedaqoji Universitetində amerikalı alimin “Təhsildə tədqiqat” mövzusunda məruzəsi dinlənilib
Bakı, 27 mart, AZƏRTAC
Martın 27-də Azərbaycan Dövlət Pedaqoji Universitetində (ADPU) ABŞ-ın Kolumbiya Universitetinin professoru xanım Amra Sabic-El-Rayessin “Təhsildə tədqiqat” mövzusunda məruzəsi dinlənilib. Tədbir ADPU-nun və ABŞ-ın ölkəmizdəki səfirliyinin birgə təşkilatçılığı ilə keçirilib.
ADPU-dan AZƏRTAC-a bildirilib ki, bu ali təhsil ocağının tədris işləri üzrə prorektoru, dosent Eldar Aslanov bu cür tədbirlərin təşkilinin təhsilin keyfiyyətinin yüksəldilməsinə, professor-müəllim heyətinin fəallığının artırılmasına xidmət etdiyini deyib. Qeyd olunub ki, təhsil sahəsində tanınmış və nüfuzlu mütəxəssis olan Amra Sabic-El-Rayess müvafiq istiqamətdə aktual mövzularda müxtəlif dəyərli tədqiqatlar aparıb. Həmin tədqiqatlar sosial mobilliyi, inkişafı, təhsil liderliyini və təhsil təşkilatçılığını, keyfiyyətli müəllim hazırlığını, radikalizmi, korrupsiyanı, qadınların cəmiyyətin inkişaf prosesindən kənarda qalmamalarını və digər vacib məqamları əhatə edir. Gənc və perspektivli alim Amra Sabic-El-Rayess təhsil sahəsində bir sıra məsələləri yüksək səviyyədə tədris və tədqiq edib.
Təhsil sahəsində apardığı tədqiqatlar barədə məlumat verən qonaq müxtəlif genişmiqyaslı layihələr həyata keçirdiyini, bir çox ölkələrdə aztəminatlı ailələrin övladlarının və qadınların təhsilə cəlb edilmələri üçün məqsədyönlü fəaliyyət göstərdiyini, həmçinin radikalizmə qarşı mübarizə apardığını bildirib. Vurğulanıb ki, təhsil hər bir ölkənin, xalqın inkişafının əsas amili, uğurlu gələcəyinin həlledici təminatçısıdır. Təhsildə bilik, bacarıq, səriştə əsas meyar kimi götürülməlidir. Təhsil daim dəyişən, yeniləşən, inkişaf edən bir sistemdir. Təhsil sosial mobilliyə keçiddə mühüm rol oynayır, bu işdə ən gözəl və uğurlu mexanizmdir.
Ayrı-ayrı ölkələrin təhsil sahəsindən konkret rəqəmlər, statistik göstəricilər əsasında nümunələr gətirən Amra Sabic-El-Rayess diqqətə çatdırıb ki, ABŞ-da irqi, etnik və dini mənsubiyyətindən, sosial mənşəyindən asılı olmayaraq biliyi, bacarığı və səriştəsi ilə fərqlənən aztəminatlı ailələrin övladları universitetlərə qəbul edilirlər. Onların təhsili, inkişafı diqqət mərkəzində saxlanılır. İnkişaf etmiş ölkələrin ali təhsil müəssisələri öz fəaliyyətlərini və rəqabətqabiliyyətli tələbə hazırlığını qlobal dünyada baş verən böyük dəyişikliklərə uyğun qururlar.
ADPU-nun rektoru Cəfər Cəfərov qeyd edib ki, “Təhsildə tədqiqat” mövzusunda məruzə əslində böyük inkişaf prosesinin tərkib hissəsidir. ABŞ-da bilikli, istedadlı, bacarıqlı insanların ölkənin inkişafına xidmət etmələri üçün xüsusi mexanizmlər mövcuddur. Rəqabət mühitinin yaranması inkişafa xidmət edir. ABŞ-ın inkişafının kökündə məhz bu amil dayanır.
ADPU-nun beynəlxalq əlaqələr üzrə prorektor Nigar Abbaszadə, professor Buludxan Xəlilov, dosent Şahin Pənahov, dosent Yusif Alıyev və başqaları ali təhsil müəssisələrinin şəffaf və obyektiv fəaliyyəti, gələcəkdə müxtəlif ölkələrdə təhsil sahəsində proqnozlaşdırılan inkişaf meyilləri, müəllimlərin keyfiyyətli tədris etmək bacarıqları ilə bağlı fikirlərini bölüşüblər.
Bölmənin digər xəbərləri
