Azərbaycan Gənc Qan Donorlarının II Forumu keçiriləcək
Bakı, 3 iyun, AZƏRTAC
Könüllü və təmənnasız qan donorluğunun inkişafına dəstək vermək məqsədilə iyunun 6-da Bakıdakı “Hilton” otelində Azərbaycan Gənc Qan Donorlarının II Forumu keçiriləcək.
Forumun təşkilatçıları Səhiyyə Nazirliyinin İctimai Səhiyyə və İslahatlar Mərkəzi (İSİM), B.Eyvazov adına Elmi-Tədqiqat Hematologiya və Transfuziologiya İnstitutunun Mərkəzi Qan Bankı, Azərbaycan Qızıl Aypara Cəmiyyəti və İran Qızıl Aypara Cəmiyyəti, Qan Donorları Assosiasiyası, “Hematologiyanın İnkişafına Dəstək” İctimai Birliyi və Azərbaycan Talassemiya Federasiyasıdır.
İSİM-dən AZƏRTAC-a verilən məlumata görə, 14 iyun - Ümumdünya Qan Donoru Günü ərəfəsində keçiriləcək forumda Azərbaycanda qan donorluğunun inkişafında fəaliyyət göstərən dövlət və qeyri-hökumət təşkilatlarının nümayəndələri, o cümlədən qan donorları iştirak edəcəklər.
Forumda məruzələr dinləniləcək, donorların iştirakı ilə çəkilmiş “Qan ver, həyat bəxş et!”, “Qan donorluğu: sən onları xilas edə bilərsən!” videoçarxları nümayiş olunacaq, Mirzə Ələkbər Sabir Fondunun prezidenti Sevda Tahirlinin “Qanımızın səsi” kitabı təqdim ediləcək. Həmçinin il ərzində qan donorluğuna töhfə verən təşkilat və donorlar mükafatlandırılacaq.
Bölmənin digər xəbərləri
