AZƏRBAYCAN GİMNASTLARI BEYNƏLXALQ TURNİRDƏ İŞTİRAK EDƏCƏKLƏR

19.02.2004 [20:04]
Çap et
A⁺ A^-

Azərbaycanın idman gimnastikası komandası İranda “Fəcr” Kuboku uğrunda beynəlxalq turnirdə iştirak edəcəkdir. Fevralın 22-26-da keçiriləcək və Asiya çempionatı da adlandırılan bu ənənəvi yarışlarda Azərbaycandan 4 gimanst mübarizə aparacaqdır. Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, bunlar Teymur Şahlamazov və Faiq Qasımov (hər ikisi 1986-cı il təvəllüdlü), Şakir Şıxəliyev (1990) və Fərid Ağazadədir (1991). Məşqçi Ruslan Quliyev və hakim Vadim Zəkiyev də İrana yola düşəcəklər.

Nümayəndə heyətinin başçısı, Federasiyanın baş katibi Çingiz Şamilov demişdir ki, qarşıdakı məsul yarışlara hazırlıq prosesində gimnastlarımızın imkanlarını müəyyənləşdirmək və çatışmazlıqları aradan qaldırmaq baxımından İran turniri çox vacibdir. Onun proqnozuna görə, Azərbaycan ümumi hesabda ən güclü beş komanda sırasına çıxacaqdır.

Suriya, Özbəkistan, Ukrayna, Pakistan, Qətər, Küveyt və Səudiyyə Ərəbistanı idmançılarının da Tehrana gələcəyi gözlənilir.