Azərbaycan Gürcüstana benzin və dizel yanacağı ixrac edən ölkələr sırasında dördüncüdür
Tbilisi, 28 fevral, AZƏRTAC
Gürcüstan 2023-cü ildə Azərbaycandan 84,2 min ton benzin və dizel yanacağı idxal edib ki, bu da ümumi idxalın 7 faizini təşkil edib.
AZƏRTAC xəbər verir ki, bu barədə jurnalistlərə Gürcüstan Neft Məhsulları İdxalatçıları İttifaqının (SING) sədri Vaxtanq İobaşvili məlumat verib.
Azərbaycan bu göstərici ilə Gürcüstana benzin və dizel yanacağı ixrac edən ölkələr sırasında dördüncü yerdədir. Siyahıya 736 min tonla Rusiya başçılıq edir. Rumıya 180,6 min tonla ikinci, Bolqarıstan isə 107,2 min tonla üçüncü yerdədirlər.
V.İobaşvili bildirib ki, Gürcüstanın martın 1-dən Rusiyadan benzin idxalına tətbiq edəcəyi qadağa ölkədə yanacaq qıtlığına və qiymət artımına səbəb olmayacaq. Onun sözlərinə görə, Gürcüstan benzin və dizel yanacağı idxalını şaxələndirdiyi üçün heç bir təhlükə ilə üzləşməyəcək.
Qeyd edək ki, hazırda Gürcüstanda benzin və dizel yanacağı idxal edən beş böyük şirkət fəaliyyət göstərir, onların da ölkə üzrə 600-ə yaxın yanacaqdoldurma məntəqəsi var. Bəzi şirkətlər yanacağı Gürcüstanın topdansatış neft məhsulları bazarından alır, bəziləri isə birbaşa idxal edir. Yanacağın qiyməti növündən asılı olaraq 2,89 lari - 3,69 lari arasında dəyişir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
