AZƏRBAYCAN İDMANÇISI DÜNYA CEMPİONATİNDA BÜRÜNC MEDAL UĞRUNDA MÜBARİZƏ APARACAQDIR
İstanbulda gənclər arasında sərbəst, yunan-Roma və qadın güləşi üzrə dünya çempionatı davam edir.
AZƏRTAC xəbər verir ki, iyulun 30-da yunan-Roma güləşi üzrə yarışlarda Azərbaycanı 3 idmançı təmsil etmişdir.
66 kiloqram çəki dərəcəsində yarışan Rafiq Hüseynov keçirdiyi iki görüşü qələbə ilə başa vursa da, dörddəbir finalda məğlub olmuşdur. Lakin rəqibin finala yüksəlməsi həmyerlimizə təsəlliverici görüşlərdə çıxış etmək şansı yaratmışdır.
Digər idmançılarımız - Elçin Əliyev (55 kq) və Araz Həsənov (84 kq) ilk görüşləri qələbə ilə başa vurmalarına baxmayaraq, növbəti qarşılaşmalarda məğlubiyyətə uğramışlar. Onların rəqibləri də finala yüksələ bilmədiklərindən güləşçilərimiz təsəlliverici görüşlərdə iştirakdan məhrum olmuşlar.
Xatırladaq ki, artıq çempionatda yunan-Roma güləşi üzrə gənclərdən ibarət yığma komandamız bir qızıl və bir bürünc medal qazanmışdır.
Bölmənin digər xəbərləri
