RƏSMİ XRONİKA
AZƏRBAYCAN İLƏ HİNDİSTAN ARASINDA ƏLAQƏLƏRİN QƏDİM TARİXİ KÖKLƏRİ VARDIR VƏ BU ƏLAQƏLƏR İNDİ DAHA SÜRƏTLƏ İNKİŞAF EDİR
AZƏRBAYCAN PREZİDENTİ HEYDƏR ƏLİYEV HİNDİSTANIN RESPUBLİKAMIZDA YENİ TƏYİNOLUNMUŞ SƏFİRİNİN ETİMADNAMƏSİNİ QƏBUL ETMİŞDİR Azərbaycan Respublikasının Prezidenti Heydər Əliyev iyulun 2-də Prezident sarayında Hindistan Respublikasının ölkəmizdə yeni təyin olunmuş fövqəladə və səlahiyyətli səfiri Cyoti Svarup Pandenin etimadnaməsini qəbul etmişdir. Hindistanın səfiri CYOTİ SVARUP PANDE öz etimadnaməsini Azərbaycan Prezidentinə təqdim edərək dedi: - Zati-aliləri, cənab Prezident! Mən öz ölkəmin Prezidentinin etimadnamə məktubunu Sizə təqdim etməkdən böyük şərəf duyuram. Bizim xalqlarımız müasir dünyada bir sıra çətinliklərdən keçərək beynəlxalq aləmdə özlərinə layiqli yer tapmışlar. Xalqlarımız arasında illərdən bəri həm mədəniyyət, həm də ticarət sahəsində geniş əlaqələr olmuşdur. Hindistan hökumətinin nümayəndəsi kimi, səlahiyyətimdə olan bütün vasitələrdən istifadə edərək, bu münasibətləri bütün mümkün yollarla daha da möhkəmləndirməyə çalışacağam. Cənab Prezident, bütün dünyaya bəllidir ki, Siz öz xalqınızı dəfələrlə çətin sınaqlardan məharətlə çıxarmısınız və indi də müstəqil dövləti müdrikliklə idarə edirsiniz. Xalqım, hökumətim adından və öz adımdan Sizə möhkəm cansağlığı arzu edirəm. Sağ olun. Azərbaycan Prezidenti HEYDƏR ƏLİYEV səfirin etimadnaməsini qəbul edərək dedi:-Hörmətli cənab səfir! Mən sizi Hindistanın Azərbaycanda fövqəladə və səlahiyyətli səfiri təyin olunmağınız münasibətilə təbrik edirəm, sizə işlərinizdə uğurlar arzulayıram. Hindistan ilə Azərbaycan arasında əlaqələr çox qədim tarixə malikdir. Biz keçmişdə də əməkdaşlıq etmişik, ticarət aparmışıq, başqa əlaqələr olmuşdur və bunu indi də etmək istəyirik. Biz sizin ölkəyə həmişə xoş münasibət bəsləmişik və sizdən də xoş münasibət görmüşük. Bizim xalqlarımızın həyatında, adət-ənənəsində həm Hindistana, həm də Azərbaycana məxsus olan ümumi xüsusiyyətlər var. Biz bunları qoruyub saxlayırıq. Sizə Azərbaycanda səfirlik işinizdə uğurlar arzulayıram. Əmin ola bilərsiniz ki, Azərbaycanda sizin səfirlik fəaliyyətinizi həyata keçirmək üçün bütün imkanlar yaradılıbdır. Sizi bir daha təbrik edirəm, uğurlar arzulayıram. X X XPrezident Heydər Əliyev səfir Cyoti Svarup Pande ilə xatirə şəkli çəkdirdi.Sonra Azərbaycan Prezidenti Heydər Əliyev səfir Cyoti Svarup Pande ilə səmimi söhbət etdi, ona ölkəmizdəki fəaliyyətində uğurlar arzuladı. X X X Etimadnamənin təqdim olunması mərasimində xarici işlər naziri Vilayət Quliyev, Prezidentin Katibliyinin rəisi Dilarə Seyidzadə, Prezidentin İcra Aparatının xarici əlaqələr şöbəsinin müdiri Novruz Məmmədov iştirak edirdilər.