Azərbaycan İstanbulda keçiriləcək dünya stomatoloqları konqresində təmsil olunacaqdır
Bakı, 29 iyul (AZƏRTAC). Avqustun 28-dən 31-dək Türkiyənin İstanbul şəhərində Dünya Stomatoloqları Birliyinin təşkilatçılığı ilə 101-ci dünya stomatoloqları konqresi keçiriləcəkdir.
AZƏRTAC Türkiyə KİV-lərinə istinadla xəbər verir ki, tədbir bu il Avropada təşkil edilən ən böyük konqres olacaqdır.
Azərbaycandan stomatoloqlardan ibarət nümayəndə heyətinin də iştirak edəcəyi tədbirdə Avropa və Amerika qitəsinin 113 ölkəsindən 7 min diş həkiminin 1300 elmi məruzəsi dinləniləcəkdir.
Konqres çərçivəsində 71 konfrans, 7 panel iclası, 29 kurs, 16 mütəxəssislə görüşmə tədbiri təşkil olunacaqdır.
Tədbir çərçivəsində Dünya Ağız Diş Sağlamlığı Forumu, Dünya Qadın Stomatoloqları Forumu, III Qonşu Ölkələr Stomatoloqları Birlikləri Əməkdaşlıq Platformu və 300 xarici şirkətin qatılacağı stomatologiya sərgisi keçiriləcəkdir.
Konqresdə stomatoloq peşəsi sahəsində ən son texnoloji və elmi yeniliklər müzakirə ediləcəkdir.
Konqresin sonunda ağız və diş sağlamlığı ilə ümumi sağlamlıq arasındakı əlaqənin əhəmiyyətinə dair İstanbul Bəyannaməsi qəbul olunacaqdır.
Bölmənin digər xəbərləri
