AZƏRBAYCAN KANOEÇİSİ AVROPA ÇEMPİONUDUR
Bakı, 27 iyun (AZƏRTAC). Azərbaycan Milli Avarçəkmə Federasiyasının mətbuat xidmətindən bildirmişlər ki, kanoeçimiz Valentin Demyanenko Almaniyanın Brandenburq şəhərində davam edən Avropa çempionatında 200 metrlik məsafəyə yürüşdə bütün rəqiblərini qabaqlamış və qızıl medal qazanmışdır.
O, seçmə mərhələdə 200 metrlik məsafəni 41 saniyə 266 mikrosaniyəyə qət edərək, I yeri tutaraq birbaşa əsas finala vəsiqə qazanmışdı. Həlledici mərhələdə isə 26 yaşlı kanoeçimiz Rusiya, Litva, Ukrayna, Almaniya, Macarıstan, Fransa, Rumıniya və Portuqaliya təmsilçiləri ilə mübarizə aparmış, bu dəfə eyni məsafəni 39 saniyə 308 mikrosaniyəyə qət edərək, fəxri kürsünün ən yüksək pilləsinə qalxmışdır.
Lakin bu, hələ son deyil. Kanoeçilərimiz daha 3 medal qazana bilərlər. İyunun 27-də Maksim Prokopenko-Sergey Bezuqlı dueti 2 nəfərlik qayıqda 1000 metrlik məsafəyə final yürüşündə çıxış edəcəkdir. İyunun 28-də Valentin Demyanenko birnəfərlik qayıqda 500 metrlik məsafəyə final yürüşünə qoşulacaqdır. Həmin gün Prokopenko-Bezuqlı cütlüyü 500 metrlik məsafəyə yürüşün final mərhələsində yarışacaqdır.
######
Bölmənin digər xəbərləri
