AZƏRBAYCAN KİNEMATOQRAFİYASININ KLASSİK NÜMUNƏLƏRİ İNGİLİS DİLİNƏ TƏRCÜMƏ OLUNUR
AZƏRTAC xəbər verir ki, Azərbaycan kinematoqrafiyasının klassik nümunələri “Arşın mal alan” və “O olmasın, bu olsun” filmləri ingilis dilinə tərcümə olunur. 1950-ci illərin istehsalı olan iki film-“Xəzər neftçiləri haqqında dastan” və “Dənizi fəth edənlər” ekran əsərləri artıq tərcümə edilmişdir.
İki aydır ki, dahi Üzeyir Hacıbəyovun eyni adlı operettaları əsasında müxtəlif illərdə çəkilmiş “Arşın mal alan” və “O olmasın, bu olsun” kinokomediyalarının subtitrlə ingilis dilinə tərcüməsi davam edir. Dublyaj layihəsi Mədəniyyət və Turizm Nazirliyinin təşəbbüsü ilə Dövlət Filmfondunun arxivindəki nüsxə əsasında həyata keçirilir.
Mədəniyyət və Turizm Nazirliyinin sektor müdiri Yusif Şeyxov layihə ilə bağlı bildirmişdir ki, məqsəd milli kino mədəniyyətimizi beynəlxalq aləmdə tanıtmaqdır.
Tərcümə yekunlaşdıqdan sonra filmlər disklərə toplanacaq və DVD formatında təqdim olunacaqdır. Layihə kommersiya xarakteri daşımadığına görə, disklər Azərbaycan günləri çərçivəsində xaricdə nümayiş etdiriləcəkdir. Həmçinin bu disklərdən səfirlik və diaspor təşkilatlarına da göndəriləcəkdir.
Yaxın gələcəkdə milli kino nümunələrimizin digər əcnəbi dillərə tərcüməsi də nəzərdə tutulur.
Bölmənin digər xəbərləri
